Ilizwe leMelika lithi likhathazwa ngokwenzakala kwele Zimbabwe lapho okubotshwa abantu mahlayana kulandela ukhetho olwenziwe ngeviki ephelileyo.
UHeather Nauert, isikhulumeli sohlangothi lukahulumende olubona ngokudlelana lamanye amazwe olwe State Department, uthi kuyethusa okwenzakala eZimbabwe njengoba kulabantu abatshaywa ngamasotsha lamapholisa njalo lohulumende owephula ilungelo likazulu.
UNauert uthi abantu abathwele nzima yilabo abasekela amabandla aphikisa ele Zanu PF elinqobe kukhetho lolu kanye lomkhokheli walo uMnu. Emmerson Mnangagwa.
Uthi kumele kumiswe konke lokhu nguhulumende weZimbabwe njengoba kungavunyelwa kuhulumende omutsha okhokhelwa nguMnangagwa owasusa uMnu. Robert Mugabe esikhundleni nyakenye.
UNauert uthi, “Sihlutshwa njalo ngokwenziwe lilizwe leZambia elibisele uMnu. Tendai Biti eZimbabwe lobanje lokhu bekuvinjwe ngumthethwandaba. Lokhu kwephula inhliziyo ngoba ilizwe leZambia lagcina abantu abanengi okumangalisayo ngesikhathi abansundu belwisana labamhlophe ngesikhathi ilizwe lisaziwa ngokuthi yiRhodesia. Sizaxoxisana leziphathamandla zelizwe leZambia ngodaba lolu ukwenzela ukuthi sibone esingakwenza ngezivumelwano zethu labo kwezokudlelana kwethu.”
Uthi ilizwe leZimbabwe kumele libone ukuthi uBiti uphathwa ngemfanelo.
“Sifisa ukuthi inkokheli yakwele Zimbabwe igcine kahle uMnu. Biti ngokungakhahlanyezwa nguhulumende. Sesixoxe labamele ilizwe leZimbabwe ngapha eWashington DC sabazisa ukuthi akusiphathi kahle okwenzakala kuMnu. Biti.
“Ilizwe leZimbabwe belilethuba lokuthi lilungise konke okubahluphayo ngaphansi kukahulumende omutsha kodwa kukhanya engani ubudlwangudlwangu lobu buveza ukuthi uhulumende kahloniphi amalungelo kazulu njalo lesisekelo sombuso welizwe. Kusobala ukuthi konke lokhu okwenzakalayo ayisikho okufunakalayo ebantwini beZimbabwe.”
UMongameli Donald Trump usanda kusayina iziqondiso zomthetho weZimbabwe Democracy and Economic Recovery Amendment Bill, ukuthi kubengumthetho.
Iziqondiso lezi zikubeka sobala okumele kwenziwe lilizwe leZimbabwe nxa lifuna ukuba lokudlelana okuphakeme lelizwe leMelika.
Ele Melika lithi ilizwe leZimbabwe kumele lenze ukhetho olubalulekileyo njalo lihloniphe ilungelo likazulu.
Abantu abayisikhombisa babulewe ngamasotsha ngeviki ephelileyo ngesikhathi kulabantu abatshengisela emigwaqweni besola ukuphuza kokwethulwa kwempumela yokhetho yikhomishini yeZimbabwe Electoral Commission.