Umqondisi wenhlanganiso ye Centre for Research and Development, uMnumzana Farai Maguwu obotshwe ngemva kokwethula ugwalo oluveza ukwephulwa kwelungelo loluntu emigodini yamadiamonds koChiadzwa, usiwe esibhedlela se Avenues ngolweSine ngoba engenwe ngumqando esesitokisini, kubika amagqwetha akhe.
Elinye lamagqwetha akhe uMnumzana Tinoziva Bere utshele lumsakazo ukuthi icala eletheswa uMaguwu lokuqamba amanga selizathoniswa ngoMvulo.
Kunjalo nje inhlanganiso ye World Diamond Council isikhuthaze uhulumende weZimbabwe ukuthi akhulule uMaguwu ngaphambilini komhlangano omkhulu weKimberly Process ozakwenziwa eIsrael kusukela ngoMvulo ngeviki ezayo.
Umhlangano lo ngowokuhlaziya udaba lwamadhayimane emhlabeni jikelele, njalo umhlangano lo ukhangelelwe ukuphatha udaba lweZimbabwe.
Ihlanganiso yeWorld Diamond Council ithi amalungiselelo omhlangano lo asefike kubanga eliphezulu kodwa ukuze izinto zihambele kuhle eleZimbabwe, kumele uhulumende akhulule uMaguwu laye obekhangelelwe ukuya emhlanganweni lo.
UMnumzana Walter Nsununguli Mbongolwane, ingcwethi kwezenotho utshele uBrenda Moyo weStudio 7 ukuthi uhulumende weZimbabwe ubophe uMaguwu ukwenzela ukuthi engayichaya imfihlo yakoChiadzwa emhlabeni jikelele,emhlanganweni weIsrael.
