Umanisiphala wakoBulawayo wethule umbiko othi sebemise umsebenzi wokudonsa amanzi asetshenziswa yizakhamizi zaleli dolobho, edamu leUpper Ncema kusukela NgoMqgibelo weviki edluleyo ngoba isilinganiso samanzi edamu leli sesehle kakhulu safika kokune ekhulwini-4%.
Isikhulumi sekhansili yedolobho lakoBulawayo, uNkosazana Bongiwe Ngwenya uchasisa kabanzi ngaleli nyathelo.
“Idolobho lakoBulawayo lithanda ukwazisa uBulawayo ukuba idamu leUpperNcema selimile ukusetshenziswa noba beselisele lesilinganiso samanzi okune ekhulwini. Amadamu asele esebenza abalisa uLower Ncema, Umzinwane, Insiza, Mtshabezi leInyankuni akusilinaniso esedlula amatshumi amahlanu ekhulwini.”
UNkosazana Ngwenya uthi ukwabelwa kwamanzi evalwa ngezinye zezikhathi kuzaqhubekela phambili ngendela ekhona manje.
"Ikhansili iyaqhubekela phambili iavunela uzulu amanzi okwamahola angamatshumi amabili lane njalo siqhubekele phambili sidonsa amanzi kuzibholane eziseNyamandlovu njalo uhlelo lwe Epping Forest lungaphela luzatholisa njalo uBulawayo amanzi. Sikhuthaza uzulu ukuba asebenzise amanzi ngendlela enhle."
Isakhamuzi sakoBulawayo, uNkosazana Soneni Nyoni ukhala ngokuthi lokhu beqhubekela phambili bebhekane lodubo lwamanzi.
“Sihlala Emakhandeni, amanzi ayahamba ngikhuluma ngisenzenje ahambe izolo ekuseni ayaze aphenduke njalo kusasa ekuseni. Udubo lwamanzi luphambili njalo lapho esihlala khona akulazibholane ezisebenzayo. Asazi ukuthi ubunzima bamanzi buyaphela nini lokuthi izibholane ziyaluniswa nini."
Ukwabelwa kwezakhamizi amanzi bevalelwa okwamahola angamatshumi amabili lane edolobheni lakoBulawayo kuqhubekela phambili. Kulamadamu amahlanu asebenzayo okwamanje, abalisa eleLower Ncema, Umzingwana, Insiza, Mtshabezi leInyankuni yiwo asese lamanzi anathwa nguBulawayo njalo okwalamuhla ebekusilinganiso esiphezukwamatshumi amahlanu ekhulwini.
