Izakhamizi zakoBulawayo ziveza imibono ehlukeneyo ngemihlangano yokuthatshwa imibono ngohlelo lokuhlelwa kwendleko lokubuthaniswa kwemali yekhansili yaleli dolobho olweBudget yomnyaka ozayo oka2022.
Imihlangano le, ihlelwa ukuqhutshwa enkundleni zebulenjini ezehlukeneyo, kulandelwa iziqondiso zokuzivikela kuCovid-19 ezithi abantu bengaminyani njalo bengabuthani besedlula ikhulu.
Isakhamuzi sakoBulawayo uMnu Moses Mpala uthi ukhangelele ukuba kuhluzwe indaba zokutholakala kwemali yokuthuthukisa imisebenzi ethile enjengokutholakala kwamanzi lokunye.
“Mina ngombono wami ngikhangelele ukuba sikhulume ngezibhedlela zekhansili, imigwaqo lamanzi kuyadingakala ukuba kufakwe imali enengi ngoba lezizzinto zikhangela kakhulu ngempilo zabantu.”
Isikhulumi sekhansili yakoBulawayo uNkosikazi Nesisa Mpofu uthi sebeqalile uhlelo lwabo lolu.
“Sesiqalile ukwenza amabudget consultations ka2022 silandela umthetho wesisekelo selizwe, sikhuluma lezakhamizi besitsho abakuqakathekisayo ukuze imibono yabo ibeyingxenye yalokho okuzahlelwa.”
Unkosikazi Mpofu uqhubekele phambili enxusa abantu ukuba baphatheke kuzozonke inkundla zebulenjini baphanyeke imibono yabo.
“Sizabesisebenzisa zonke inkundla zebulenjini sithapha imibono kazulu singaphansi kweziqondiso zebulenjini ukuze singamemethekisi igcikwane leCovid. Sinxusa wonke umhlali wakoBulawayo ukuba aphatheke kule imihlangano yokuba idolobho liphathwa njani.”
UMsekeli kaMayor wedolobho leli, uKhansila Mlandu Ncube uthi njengekhansili bayezwa insolo abalazo ngalezinkundla zebulenjini ngokunjalo bayazilungisisa inkinga ezikhona.
“Siyabonga Zulu, uhlelo lokubonisana ngokusebenza kwemali zedolobho zomnyaka ozayo seziqalile njalo sicela uzulu ukuba phatheke kuloluhlelo. Okunye ebesikucela yikuba wonke umuntu azizwe ekhululekile ukupha umbono wakhe njalo sesizwile ukuba liyakhonona ngenkundla zebulenjini esizazisebenzisa ngakho besicela ukuba wonke umuntu aphatheke ngokugcwleyo aphe imibono yakhe.”
Ikhanili yakoBulawayo ithi ngomnyaka odluleyo basebenzise inkundla zinye zebulenjini ukuthapha imibono kazulu ngebudget ka2021, konke kwahamba kuhle ngakhoke lonyaka babone kufanele ukuzisebenzisa njalo bekhangelele ukuba uzulu uzaphatheka ngobunengi.
Ngakwelinye icele uzulu uyazisola inkundla zebulenjini ukuba aziyikuthapha kuhle imibono yazo kodwa uyamukela ukuba akula nginye indlela ngaphandle kokuphatheka kuhlelo lwebudget ka2022 ekhangelele inguquko langendlela zokubuthanisa imalli yokuthuthukisa izibhedlela lamakilinika ekhansili, imigwaqo lokutholakala kwamanzi ahlanzekileyo.
