lzakhamizi zakoBulawayo, abatshayeli bezimota labamabhayisikili basola inyathela likaManisipala wakoBulawayo lokumisa ukulungiswa kwemigwaqo esimagodigodi ngesizatho sokuthi phansi kumanzi kakhulu akusasebenzeki.
Phose yonke imigwaqo edolobheni lakoBulawayo ayisahambeki ngezimota loba ngenyawo ngenxa yamagodigodi lawa.
Usomabhizimusi wezimota uMnu Mathew Sibanda uthi ayisilo nyathela elihle eselithethwe ngukhansili.
“Kuyangimangalisa okwenzakala edolobheni lakoBulawayo imigwaqo yonke ifile ayihambeki sekuphambili ngalesi isikhathi sezulu imigwaqo ingamachibi, uma ikhansili isisima ukulungisa imigwaqo kutsho ukuthi sekuyakuba lezingozi thile akulunganga lokhu okwenzakala edolobheni.”
Isakhamuzi sakoBulawayo uMnu Mandlenkosi Mloyi uthi kulilungelo labo ukuthi balungiselwe imigwaqo njengabatshyeli njengoba bebhadala imithelo.
“Kuyadanisa emigwaqweni akusahambeki, njengabatshayeli sekusidla esambeni siyathenga insimbi ezifayo zezimota uhulumende kangenele ngoba siyabhadala imithelo kuZINARA.”
Isikhulumi sekhansili yedolobho lakoBulawayo uNkosikazi Nesisa Mpofu uchasisa ngenyathelo labo lokumisa ukulungiswa kwemigwaqo ngesikhathi
“Siyananzelela ukuthi ngalesisikhathi sezulu imigwaqo yethu eminengi ifile, imigwaqo yethu isigugile njalo imali yokuyilungisa iyasilela okwedlula iminyaka elitshumi isinzima ukuyisebenzisa. Sile 2,400km, 75 percent yayo idinga ukulungiswa ngesiphangiphangi imali edingakalayo yi$700m ukuze silungise yonke ibukeke. Ukuthi silungise imigwaqo yethu engaba yi340km kudingakala iUSD$15m munyaka munye okweminyaka emihlanu ilandelana.”
Uqhubekele phambili ethi kudingakala imali engekhoyo ekhansilini ukuba imigwaqo yonke yedolobho ilungisiswe.
“Siyananzelela ukuthi ikhansili imali efunakalayo incane besincediswa yiZINARA kuroad condition survey saphuma lendlela esingalungisa ngayo imigwaqo yethu sidinga imali ukuthi silungise, kumnyaka ka2022 sidinga imali yokulungisa kodwa okwamanje sisamile ngoba izulu liyana akusebenzeki sizaqala ukusebenza izulu selimile kumbe selehlile.”
Ikhansili yedolobho lakoBulawayo iyavuma ukuba isimo semigwaqo asisesihle kulandela ukuna kwezulu elinengi kuleli dolobho njalo imigwaqo eminengi isidinga ukulungiswa kutsha ngoba isimisala bethi isimo semigwaqo sesisisbi kulandela ukuhlala iminyaka ethile ingalungiswa ngesizatho sokusilela kwemali.
