Ngqwele Dube
Ikhansili yakoBulawayo isidwebe imingcele emitsha - igrand master plan - egoqela amalokitshi lezigaba ezibalisa Inhliziyo, Emthunzini, Hopelyn, King City, Lovendale, Rangemore lezinye.
Ikhansili le ithi abazakuba yingxenye yayo bazafakwa engwalweni zayo okuzakwenza ukuthi bethole amanzi ahloliweyo, babelezambuzi zakulez'insuku njalo bebuthelwe ingcekeza.
Ukuqhela kwedolobho leli kungavunyelwa nguhulumende, amakhansili agoqela eyeUmguza, Matopo, Esigodini kanye leTsholotsho azamanyana loBulawayo.
Isikhulumeli sekhansili yakoBulawayo, uNkosikazi Nesisa Mpofu, uthi okwamanje bakhangele ukuthatha indawo lapho abanikazi bomhlaba abazicelele khona.
Uphinde wathi uhulumende nguye olomlandu wokuqhelisa umngcele wesabelo sako Bulawayo phansi komthetho wePresidential Proclamation 15E of 2004 okuzakwenza idolobho leli lithuthuke ngokuyisilinganiso samakilometers angamatshumi amane- 40 kilometers indawo zonke.
“Ukuqhelisa kwama Provincial Boundaries, efakwe ku Proclamation ka2004 kusemandleni kahulumende. Thina esikuyenzayo yi-voluntary incorporation lapho abantu abazicelela ukuba ngaphansi kwekhansili yakoBulawayo."
UMnumzana Lovemore Sibanda owathenga umhlabathi wokwakha indlu eMbundane ngomnyaka ka2000, wakha njalo waqala ukuhlala khona ngo2017 uthi kalamanzi empompi.
Uthi kuzwisa usizi ukuba basebenzisa izambuzi zemigodi.
USibanda uthi ma ekhangele kulokitshi eliseceleni kwabo eleMganwini elingaphansi kwedolobho lakoBulawayo kuthi akhale ngoba lithola amanzi njalo izambuzi zilamanzi lezibi ziyabuthwa.
“Indubo zinengi lapha ikakhulu olwamanzi yilo oluhluphileyo kodwa lama toilet akula sisebenzisa ama Blair toilet.”
UNkosikazi Getrude Dube, laye ohlala eMbundane, uthi bathwele nzima.
“Amanzi asila ayahlupha njengoba libona ngithwele izigubhu, siyahlupheka kakhulu, lokuthi ahlanzekile amanzi asikwazi siyawanatha kuphela.”
Ziyakhala lezakhamizi zeMthunzini. UNkosikazi Mavis Ngwenya uthi bathwele nzima.
“Izibi zigcwele nje indawo yonke, ziyabuthwa mbani?”
UNkosazana Natasha Moyo, oleminyaka yokuzalwa engamatshumi amabili lasikhombisa - 27 uthi sebekhathele ngezambuzi abazisebenzisayo ngakho-ke kuqondile ukuba bebephansi kwekhansili yakoBulawayo.
“Abanye abala ma Blair lawa so kuyahlupha worse nxa ulabantwana kubanzima. Singathokoza kakhulu ma lathi singathola amanzi lokubuthelwa izibi."
Kukhangelelwe ukuba uhulumende uzakwamukela isicelo sekhansili le ukuthi iqhelise umngcele njengalokhu ekufisayo okungenza abahlali abahlala ezigabeni ezitshiyeneyo bethole amanzi ahloliweyo lokunye okungenza behlale kahle.
Forum