lkhansili yakoBulawayo ibe lomkhosi wokabela izipho kwabenhlanganiso ezithile eyazibuthanisayo phansi kohlelo lwalelo dolobho, olwenziwa minyaka yonke ngalesi sikhathi seKhisimusi, olweMayors Christmas Cheer Fund.
Imizi ehlukeneyo yakoBulawayo edlula itshumi lambili yamukele ngenjabulo izipho ezabelwe luhlelo lweBulawayo Mayors Christmas Cheer Fund zempahla ehlukeneyo kusukela kuzembatho, ukudla ledili elihlelwe ukwenziwa ngoLwesithathu, emzini oweNtembeni Old People Home.
Ekhuluma emkhosini wangoLwesibili, uMayor wakoBulawayo, uKhansila Solomon Mguni ubonge amankampani athe apha loba kunzima ngesikhathi sobhubhane olweCovid-19.
“Silohlelo lwethu lweMayors Christmas Cheer Fund lapho idolobho eliqoqa khona abafisa ukunika abadubekayo, lamhlanje basiphile lathi sesidlulisele kwabamele bathole sithanda ukubonga wonke amankampani athe apha loba bekunzima ngeCovid kodwa bakhumbula abanye abantu.
UNkosikazi Sakhile Tshuma- Chakauya oweNtembeni Old Peoples Home uthi umsebenzi uba lula nxa bethola uncedo olunje kuzenza ledili labo kusasa libelihle.
“Siyabonga kakhulu ngesipho lesi esisithole lamhlanje sifike ngesikhathi esihle njalo sizasiqhuba umango omude sibili. Siyabonga kakhulu silabokhulu abayi 30 laboGogo abangu 21, ngumsebenzi omkhulu kodwa uma sincediswa umsebenzi ubalula uyahambeka Siyabonga kakhulu ngesipho lesi esisuke kuBulawayo Mayors Christmas Cheer Fund.”
UHon Tholakele Mahlangu Khumalo, omele iHaven Trust laye ngomunye oveze injabulo yokuthola isipho.
“Siyabonga kakhulu isipho sempahla lokudla esikuthole lamhlanje silabomama abane Labantwana abadlula isthumi ngabe sithole impuphu enengi bekuzanceda kakhulu ngoba sibhekane lodubo lokudla.”
UNkosazana Besty Ndlovu yena ubemele inhlanganiso eyeThuthuka kulumkhosi.
“Siyathaba kakhulu ngoba iCovid isenze sasala egcekeni kodwa abantwana bezenelisa ukuthi bengafika bathole okuya ethunjini bageze bawatshe njlo bagqoke.”
Uhlelo lweMayors Christmas Cheer Fund lwenziwa minyaka yonke lapho amankampani, inhlanganiso ezehlukeneyo lozulu jikelele abapha izipho eziphetha ziphiwa abaswelayo koBulawayo ukuze labo babe lesikhathi sokujabulela iKhisimusi.
Isikhwama seMayors Christmas Cheer Fund asivalwanga okwamukela izipho ezisuka kumankampani ahlukeneyo lozulu okuzathi kuphiwe njalo abanye abadinga usizo.
