Ikomithi yohlangothi lwenhlanganiso ebona ngokulondolozwa kwamalungelo oluntu emhlabeni wonke jikelele incoma eleZimbabwe elesula kusesekelo sombuso welizwe isigwebo sokulengisa abatholakala belecala lokubulala lokunye loba ichothoza ukungalungiswa kodaba lokuthathwa komhlabathi wabamhlophe njalo lokukhululeko kwezomthetho.
IHuman Rights Committee yethule lokhu emhlanganweni oqhutshelwa eGeneva lapho ethi kuhle kakhulu okwenziwa ngeleZimbabwe ngesigwebo lesi. Kodwa ithi kunengi okumele kwenziwe okufana lokuhlawula abamhlophe abathathelwa amapulazi kanye lokukhululeka kwemithethwandaba, okucatshangelwa ukuthi idlelana lohulumende kaMongameli Emmerson Mnangagwa.
Ukuhlaziya loludaba, sixoxe loMnu. Believe Gaule okubandla leZanu PF othi kuyancomeka okukhulunywa yikhomithi le njalo okumhlabathi kuyalungiseka.
Sixoxe ngodaba lolu njalo loMnu. Thembaleni Dube olandela ezombusazwe ezimele othi kunengi okumele kwenziwe ukuze kulungiswe eZimbabwe.
Kusenjalo, kuqhutshwa umhlangano omkhulu eNew York owokuhlolisisa ukulinganiswa kwelungelo labesifazana labesilisa oweCommission on the Status of Women.
Abasemhlanganweni lo ngabameli babohulumende labakunhlanganiso ezizimeleyo, okukhangelelwe ukuba bazahlaziya kabanzi ngezinqumo zeBeijing Declaration kanye lokwethulwa nyakenye emhlanganweni weUnited Assembly eNew York, okumayelana lokuthuthukiswa kwabesifazana.
Odabuka eZimbabwe osemhlanganweni lo, uNkosazana Sikhathele Matambo ongumqondisi wenhlanganiso ye-Emthonjeni Women’s Forum, uthi kuzahlaziywa okunengi kusenzelwa ukulinganisa amalungelo abesifazana labomama.
Forum