Iqembu lomdlalo wenguqu elimela ele Zimbabwe emcintisweni we CAF Confederation Cup ele FC Platinum liqale kuhle umkhankaso walo kulumncintiswano njengoba lenelise ukunqoba lidlala lingekho ekhaya ikanti iqembu elimela ilizwe emdlalweni kakhilikithi lona linqotshwe emdlalweni walo wakuqala kumncintiswano wezizwe zomhlaba.
Iqembu le FC Platinum lifake unyawo olulodwa esigabeni esilandelayo somncintiswano we CAF Confederations Cup ngemva kokunqoba elikwenze iqembu elimela ilizwe le Kenya ele Sofapaka nge 2 ka 1 khonale eKenya ngeSonto.
Limpumela itsho ukuba umthwalo usulula kabi kuqembu le FC Platinum ngoba iqembu lase Kenya sokumele linqobe ngemiklomelo emibili kungela mpendulo emdlalweni wehlandla lesibili ozakuba khona ngemva kwamaviki amabili.
Iqembu le FC Platinum lizakuthi lingenelisa ukudlululela kusigaba esilandelayo lidibane leqembu elizanqoba phakathi kweqembu le Botswana Defence Forces lele Young Africans elase Tanzania.
Kolunye udaba olumayelana lomdlalo wenguqu iqembu likamasipala wako Bulawayo ele BCC Golden Stars libe ngutshiki lobhanqa leqembu le Highlanders emdlalweni wobungane obusenkundleni yeBarbourfields ngeSonto.
Umqeqetshi weqembu likaMasipala uPhilani Ncube uthe lumdlalo ubungowokuzazisa kuzulu wako Bulawayo.
.................................
Sikhangele imidlalo yenguqu edlalwe kwamanye amazwe;
Ikhuba liyala lilokhu litshona kuqembu le AmaZulu lona elidlalelwa ngabadlali baseZimbabwe abathi unozinti uEnergy Murambadoro kanye lemvimbi uCarrington Nyadombo ngemva kokuba libhuqwe nge 3 ka nya ngele Bloemfontein Celtic ngeSonto.
Leliqembu lihlezi ngaphansi kwengalane lilemiklomelo eyithobamunwe munye kuphela ngemva kokudlala imidlalo elitshumi lathobaminwembili okutsho ukuba lisalelwe yimidlalo elitshumi lambili ukuba lisinde ekugunyulweni kusigaba saphezulu.
Iqembu elihlezi phezu kwengalane yemiklomelo ele Kaizer Chiefs beliphatheke kumidlalo yokudinga intshantshu zezwekazi lase Africa njalo linqobe ele Township Rollers eliqeqetshwa ngowaduma edlalela iqembu le Highlanders kwele Zimbabwe uMadinda Ndlovu nge 2 ka 1 ngoMgqibelo.
Lawa maqembu azadibana njalo ngemva kwamaviki amabili kwele Botswana njalo uMadinda uveze ithemba lokuba iqembu lakhe lizanqoba nxa selidlala lisekhaya.
NgaseNgilandi amaqembu athi ele Arsenal, ele Bradford, ele Aston Villa, ele Liverpool, ele Reading, ele West Brom kanye lele Stoke City yiwo asefinyelele kusigaba se quarter – final yenkezo eye FA Cup ngemva kokuphumelela emidlalweni ebikhona ngempelaviki edluleyo.
Iqembu elizakuba ngelesithoba minwe mbili elisele kulumncintiswano lizaphuma phakathi kwele Preston lele Manchester United zona ezidlala namhla ntambama.
Kwele Spain iqembu le Barcelona liqhubekela phambili lisidla amahabula kulezinsuku njengoba libhaxabule ele Levante nge 5 ka nya ngeSonto okuyimpumela edale ukuba liyale lilokhu litshiywa ngomklomelo owodwa ngele Real Madrid phezu kwengalane yemiklomelo ngemva kokuba ele Madrid lalo linqobe ele Deportivo la Coruna nge 2 ka nya ngoMgqibelo.
Iqembu le Real Madrid lile 57 points kuthi iBarcelona ile 56 ikanti iqembu elihlezi endaweni yesithathu ele Atletico Madrid lilemiklomelo engamatshumi amahlanu.
...................................
Sikhangele umdlalo kakhilikithi;
Iqembu elimela ilizwe emdlalweni kakhilikithi linqotshwe nge 62 runs ngele South Africa emdlalweni walo wakuqala kumncintiswano wezizwe zomhlaba oqhutshelwa emazweni athi ele Australia lele New Zealand.
Abafana baseZimbabwe badlale ngendlela ebukwe ngabalandeli bomdlalo kakhilikithi abanengi okuyinto epha ithemba abalandeli bomdlalo lo elizweni ukuba leliqembu linganqoba ele United Arab Emirates emdlalweni walo wesibili kusibaya sika Pool B ngoLwesine oluzayo.
Emdlalweni walo wesithathu iqembu le Zimbabwe lizadibana lele West Indies mhlaka 24 kuyonale inyanga, kowesine lizadlala lele Pakistan mhlaka 01 Mbimbitho, kulandele umdlalo leqembu le Ireland mhla ziyisikhombisa ngoMbimbitho, licine ngokudlala leqembu le India mhlaka 14 Mbimbitho.