Iqembu le FC Platinum liphakamise inkezo ye Chibuku Super Cup ngemva kokunqoba elikwenze ele Harare City kufinal edlalelwe enkundleni yeMandava ngeNsonto.
Iqembu lomdlalo wenguqu ele FC Platinum lingezelele inani lenkezo eliziphakamise lonyaka laya kwezine ngemva kokunqoba elikwenze ele Harare City kufinal eyomncintiswano we Chibuku Super Cup.
Lokhu kuza ngemva kokunqoba kwaleliqembu kumncintiswano ethi owe CG Msipa Charity Shield, owe Independence Trophy kanye lowe ZNA Charity Shield.
Ekhuluma ngemva kokunqoba kweqembu lakhe umdlali we FC Platinum uThabani Kamusoko uthe balungiselele ngemfanelo yikho bephumelele ukunqoba.
Abadlali, inkokheli kanye labasekeli beqembu le Harare City abayithokozelelanga indlela unompembe uNorman Matemera aphathe ngayo lumdlalo njalo ukaputeni waleliqembu uDavid Kutyauripo usele elensolo ngesehlakalo esidale ukuba iqembu le FC Platinum lilinganise imiklomelo.
Iqembu le Harare City likhokhele kusukela ngehlandla lakuqala lomdlalo kwathi ele FC Platinum lilinganise imiklomelo ngehlandla lesibili sekuyisikhathi esingezelelwa ngunompembe.
IFC Platinum ihlohle ngemva kokuphiwa ifree kick ekhahlelwe nguKamusoko yavalwa nguKutyauripo ibhola lawela kuWalter Musona yena oqondise esangweni kwathi imvimbi ye Harare City uArnold Chivheya wanxiba kodwa umsekeli kanompembe uOscar Bumhe wakhomba ukuba ibhola lingenile loMatemera wavuma.
Umdlalo ungene kusikhathi esingezelelweyo kodwa akubanga khona iqembu elenelise ukuhlohla kwaze kwalamula imbekwa.
Iqembu le Harare City like lanqaba ukuyathatha imendulo zalo likhonona ngokuphatha kwabonompembe umdlalo laze laya selincengwe zinkokheli zenhlanganiso ye PSL.
Iqembu le FC Platinum lithole inkulungwane ezingamatshumi ayisikhombisa lanhlanu ngokunqoba kwalo kuthi iHarare City ithole inkulungwane ezingamatshumi amahlanu.
………………………………………………………………………………………………………………………………………………………………………………………………………………………………………………………………………………………………………………………….
Kolunye udaba olumayelana lomdlalo wenguqu iqembu labaleminyaka engaphansi kwamatshumi amabili lantathu elimela ilizwe le Zimbabwe linqotshwe nge 2 ka 1 ngele Morocco emdlalweni wobungane odlalwe ngeNsonto khonale eMorocco.
Iqembu le Zimbabwe belilabadlali abadlala elizweni leNgilandi abathi u Munyaradzi Mbanje odlalela iqembu le Leeds, uDavid Moyo odlalela iqembu le Northampton kanye lo Macauley Bonne oweqembu le Colchester United.
Kusenjalo kulamazwe ayithoba minwe mbili asephumelele ukuyaphatheka kumncintiswano weAfcon ngomnyaka ozayo ngemva kwemidlalo edlalwe ngempelaviki edluleyo.
Lawamazwe ngathi ele South Africa, eleBurkina Faso, iGabon, iCameroon, iCape Verde, iTunisia iSenegal kanye le Algeria.
Umkhankaso wokudinga amaqembu azakuyadlala kulumncintiswano ozaqhutshelwa elizweni lase Equatorial Guinea ngomnyaka ozayo uqhubekela phambili ngoLwesithathu.
……………………………………………………………………………………………………………………………………………………………………………………………………………………..
Sikhangele umdlalo kakhilikithi;
Isimo somdlalo kakhilikithi kweleZimbabwe kasimanga kuhle nxa kukhangelwa impumela yemidlalo edlalwe liqembu elimela ilizwe lele Bangladesh eyohlobo lwe test ensukwini ezedluleyo.
Iqembu le Zimbabwe litshaywe kuyo yonke imidlalo emithathu eyohlobo lwe test eliyidlale le Bangladesh kodwa lilakho ukuphendukisa isithunzi emidlalweni emihlanu eyohlobo lwe One Day International elizayidlala leqembu elifanayo ezaqala ngoLwesihlanu mhla zingamatshumi amabili lanye.