Umthethwandaba waphezulu oweSupreme Court usukhiphe kuluhlu lwalo udaba lwamalunga ebandla leCitizens Coalition for Change abagoqela uMnu. Prince Dubeko Sibanda oweBinga labanye abaphikisa amandla kaMnu. Sengezo Tshabangu, ozithi ungunobhala webandla leli, ngemva kokuba amalunga la ehluleke ukubhadala imali efika inkulungwane ezinhlanu- US$5,000 edingakalayo lapho umuntu emiswa edale leli.
Ibandla leCCC lithi lizaluphanyeka futhi udaba lolu eSupreme Court, osoluhlahlwe ngumthethwandaba lo kabili.
Udaba lolu luza ngemva kokuba umahluli weHigh Court uJustice Munamato Mutevedzi wanquma ukuba uTshabangu wayelemvumo yokuxotshisa amalunga eCCC edale lephalamende. Lokhu kwenza ukuthi amalunga la alufake eSupreme Court bephikisa ukuxotshiswa kwabo besithi kabamazi uTshabangu.
Kodwa udaba lolu kalusathoniswanga namuhla ngoba abahluleli uJustice Elizabetha Gwaunza, uJustice Antonieta Guvava loJustice Alphius Chitakunye bathe idale labo kalizange lithole inhlawulo efunakalayo. Elinye lamagqwetha amele uTshabangu, uMnu. Nqobani Sithole, uthi amalunga aweCCC azikhanzinge ngamafutha abo.
“Silokhe sidinda ndawonye, ngake ngatsho ukuba ubutshapha babo yibo ubenza udaba lolu lungayi phambili namhla babuphindile futhi. Beza dale bengelala mali’ ekwenze udaba lolu lwehlula.”
Kodwa igqwetha elimele amalunga ebandla leCCC uNkosikazi Amanda Ndlovu uthi kwaba lokuphazamiseka kwendlela amagqwetha lawa akhweza ngayo udaba lolu.
“Alusazwakalanga udaba lwethu ngoba bathi imali bekumele ifakwe udaba lolu lungakazwakali.”
UNkosikazi Ndlovu uqhubeke esithi sebezamelela lokho okuzacelwa ngamalunga eCCC.
“Sesizamelela labo abasithumayo ukuba senze njani. Kodwa vele sizaphenduka edale.’’
Lokhu kusekelwe nguMnu. Jameson Timba okhokhela elinye icele leCCC.
Okuphume edale leli kutsho ukuba lokhu kumisiwe ukuxotshiswa kwamalunga ephalamende udaba lolu luze lulungisiswe yimithethwandaba yaphezulu.
UTshabangu waxotshisa amalunga edale lephalamende amanengi kwaqhutshwa ukhetho lwama by-elections, awavinjwa lidale leHigh Court ukuba encintise kulandela okwacelwa nguTshabangu. Icele leCCC elahlanyukelwa nguMnu. Nelson Chamisa okwamanje eselikhokhelwa nguMnu. Welshman Ncube labanye ababili, lakha phansi kukhetho lwama byelections kwanqoba endaweni ezinengi eleZanu PF.
Forum