Idale leSenate kwele Melika lithi uMongameli Donald Trump kalacala lokuthi wazama ukusebenzisa ilizwe leUkrainne ukuthi akhankasele ukhetho oluzayo.
Idale leli lethule isinqumo lesi eCapitol Hill ngoLwesithathu kulandela ukwetheswa kuka Trump icala lokuthi wayefuna ukusebenzisa ilizwe leUkrainne kukhetho oluzakwenziwa lonyaka ukuba kungcoliswe igama lika Mnu. Joe Biden, olakho ukuncintisana laye.
Amalunga ebandla lama Republicans phose wonke avotele ukuba uTrump kalacala. Okubandla leli, uMnu. Mitt Romney nguye yedwa ovotele ukuthi uTrump asuswe esikhundleni kudaba lokuthi wasebenzisa iwofisi yakhe okungekho emthethweni.
Abakubandla lama Democrats bonke bavotele ukuthi uTrump asusuwe esikhundleni besithi kwavinjwa abafakazi abagoqela uMnu. John Bolton, owayesebenza loTrump, ukuba ethulele idale leSenate akubonayo eWhite House.
UMnu. John Bolton uthi uTrump waveza inhlonso yakhe aze amise ukunikwa kwelizwe leUkrainne izikhali esenzela ukuthi eleUkrainne libikele umhlaba wonke jikelele ukuthi selihlolisisa okwakusenziwa nguMnu. Hunter Biden, umtaka Joe Biden, owayesebenzela inkampani ephehla umlilo kagetsi kwele Ukrainne, okuthiwa yayisenza ubukhohlakali obumangalisayo.
Abakubandla lama Democrats bathi kunengi kakhulu okufihlwa nguTrump owatshaphaza iwofisi kamongameli ngokudlelana laye lelizwe leUkrainne. Bathi wavimba lokuthi kubelabafakazi edale leHouse of Representatives elahlolisisa akwenza kwele Ukrainne nyakenye.
Abanye abakubandla lama Republicans bayavuma ukuthi uTrump wenza okungekho emthethweni lobanje bengavotelanga ukuthi asuswe esikhundleni. Bathi icala leli kalisungulwanga kahle ngama Democrats. Okhohlela idale leHouse of Representatives njalo ekubandla lama Democrats, uNkosikazi Nancy Pelosi, lomunye wakhe uMnu. Chuck Schumer, okudale leSenate, labalandeli bebanda leli abanengi bayakuphikisa lokhu.
UTrump uthi okwenziwa ngabakubandla lama Democrats kuyafana lokudinga umthakathi libalele. Ukuze sihlolisise udaba lolu, sixoxe lengcwethi kwezombusazwe, uMnu. Den Moyo, othi akumangalisi okwenziwe ngama Republicans.
