Idale leConstitutional Court linqume ngoLwesibili ukuthi isahluko 31 somthetho weCriminal Law (Codification and reform) Act asikho emthethwini ngoba sisephula isisekelo sombuso kanye lelungelo loluntu.
Kusinqumo lesi, umahluli walelidale uJustice Luke Malaba uthe islahluko lesi kasimelanga sibelendawo kumithetho yelizwe elikhululekileyo njengeZimbabwe.
Lesi sahluko siphatha udaba lokuloba amanga ngenjongo yokungcolisa, iCriminal Defamation.
Banengi asebeke babotshwa phansi kwalumthetho besetheswa icala lokuloba amanga.
Abantu laba bagoqela obeyintatheli yephephandaba leZimbabwe Independent uMnu Constantine Chimakure loVincent Kahiya, abayibo abakhweze loludaba emthethwandaba.
Uhulumende sokumele esule eminye imithetho encindezelayo efana leAIPPA lePOSA ngoba layo isephula isiseklo sombuso, kutsho isiphathamandla seVoluntary Media Council of Zimbabwe, uMnu Loughty Dube.
Kunjalo nje umsolwa kudaba lokubulawa komfanyana owayesenza uGrade One eBambadzi Primary School, ePlumtree, ngoMbimbitho uQuite Ndebele umiswe phambi komthethwandaba wePlumtree ngoLwesibili.
UNdebele wetheswa icala lokubulala uTumelo Ndlovu, yena owayeleminyaka eyisithupha. Uvele ngamafitshane edale waphinda wabuyiselwa esitokisini.