Umkhuhlane weCholera usubulele abantu abangamatshumi amabili lanye elokitshini leGlen View leleBudiriro eHarare njalo wahlasela abedlula inkulungwane ezintathu.
Lokhu kuvezwe ngumphathintambo wezempilakahle uDr Obadiah Moyo ngoLwesithathu ngemva kokubunjwa kwekomidi ezalwisana lecholera.
Lanxa umkhuhlane lo ubikwa ususabalele wafika eMidlands, eMasvingo, eManicaland laseMashonaland Central, uMoyo uthe usagxile eHarare kakhulu.
“Singeke sathi lolu sekuludubo lwelizwe lonke njengoba sileqiniso lokubana umkhuhlane lo ulokhe ukundawo zinye lapho oqhamuke khona eHarare,” kutsho uMnu Moyo.
Umqondisi wohlangothi lwezempilakahle lokulondolozwa kwemvelo ngaphansi kukamanisipala weChitungwiza, uDr Tonderai Kasu uthe baqale ukunanzelela ukuba usukhona lumkhuhlane kulindawo ngoLweSihlanu.
“Lamuhla inani selifike kutshumi lane, izolo besikutshumi ngoLwesihlanu iviki ephelileyo besilabahlanu kusitsho ukuba liyaqansa inani lakhona kodwa amanani ethu lokhe ephansi nxa siqathanisa lokwenzakala eHarare,” kutsho uKasu.
UDr Kasu uthi kungalesi sizatho sebesungule indawo lapho abahlaselwe yilomkhuhlane okumele bayekwelatshwa khona ethiwa yi Cholera Treatment Centre e kilinika ye St Marys kusukela besizwa ukuba seluchaphele emangweni wabo.
Kodwa umqondisi enhlanganisweni yezakhamizi ye Chitungwiza and Manyame Residents Association, umnumzana Marvelous Khumalo uthi inkinga yiziphathamandla ezingafundiyo ukulungisisa loludubo oseluleminyaka luvuka kokuphela.
"Kodwa thina siyakwazi ukuthi ama problems alapha yikuthi akula manzi kuma tap ethu njalo ama sewer aya burster lapha eChitungwiza, ingcekeza njalo kayithwalwa esikhathini. Konke lokhu yikho okusuke kwasekuyena ukuthi kube lodubo lolu.
U Khumalo usola njalo inkulumo yeziphathamandla kumanisipala we Chitungwiza eziqhubeka zigezela owe Harare umlandu wokubangela loludubo endaweni yokulungisisa inkinga uzulu abhekane lazo.
“Bona bengakagezeli I City of Harare kabaqale labo babone ukuthi ama conditions lawo ayenza ukuthi I Cholera iqalise,kakho yini na emzini wabo. So bona kabayekele ukujikela amatshe ku City of Harare,balungise umuzi wabo."
Abaphila ngokuthengisa endaweni yamavinkili ako Chigovanyika Shopping Centre e St Marys, bathi lanxa beyizwisisa ingozi ekhona, akukho abangakwenza ngoba bephila ngokuthengisa ukudla kulendawo.
Omunye walaba bantu kunguNkosazana Letty Gumbo oveze ukukhathazeka kakhulu ngodubo lwesihudo se Cholera.
"Kathesi vele siyabe sesidubeka ukuthi,siyesaba ukuthi ingasibamba vele iyabe iyi problem enkulu. Siyesabela ama customer ethu lapha ukuthi engadla, awukwazi ukuthi uzaba njani, uzagula uzenza njani, kuyesabisa, kubuhlungu. Ngoba umkhuhlane wakhona vele kawutshiyi muntu nxa usuqalisile kulodubo,siyawesaba vele. Siphongupheka ukuthi singenzani kodwa heyi,akwenzi. Siyayidinga impilo kodwa kunzima."
Ukhala ngokuswelakala kwamanzi emzini we Chitungwiza kakhulu lapho asebenzela khona.
"Nxa singapha thina sisebenzisa amanzi esiwathatha emgodini kodwa amanzi akhona siyabe siufuna I treatment vele ukuthi abe ngcono ekunatheni kwabantu. Hayi isitshwala sethu sibona ingani si right,angazi kukhona okungenzeka,uyabe ungazi ukuthi vele kungahamba njani. Kubuya ngempukane,impukane zakhona zinengi so siyabe sifuna umuthi wokuthi sithele,kuncede ama customer ethu nxa esidla isitshwala."
Umkamongameli uNkosikazi Auxillia Mnangagwa wethekelele lezondawo lapho okulabagulayo abahlaselwe yisihudo se Cholera emizini ye Glenview le Budiriro.
Ngaphambilini umkhokheli weMDC umnumzana Nelson Chamisa laye wethekelele endaweni eqalele khona loludubo lwesihudo se Cholera.
Isakhamuzi se Glenview uNkosikazi Saneliso Dube uveze ukukhathazeka okukhulu ngesimo abakiso.
"Sikhuluma ngendaba ye Cholera ukuthi abalungise ama sewage basinike amanzi,amanzi a clean lezikolo kufuze zivalwe I cholera iqale iphele ukuze abantwana bengabi ngabantwana abazabe be benikana I cholera esikolo. Ukudla abayabe bekudla beswela amanzi konke lokhu siyakucela ukuthi abantu baka khansili labantu be Government besincedise ngakho."
Amapholisa azise uzulu we Harare ukuba bakubone kufanele ukuke bamise ukuqhutshwa kwemihlangano yonke uzulu afisa ukuyenza ngalesi sikhathi sekuqhamuke kodubo lwesihudo se Cholera edolobheni leli.
