Iqembu lomdlalo wenguqu ele Chicken Inn selikhokhela ngemiklomelo emihlanu phezu kwengalane yemiklomelo esigabeni se Castle Premier Soccer League.
Iqembu le Chicken Inn litshaye ele ZPC Kariba nge 2 ka 1 ngoMgqibelo lakhuphula inani lemiklomelo elilayo laya kumatshumi amane lesithupha (46) ngemva kokudlala imidlalo engamatshumi amabili lambili (22).
Kundawo yesibili kuhlezi iqembu le FC Platinum lona elithe ngokunqoba ele Dynamos nge 3 ka 1 ngoMgqibelo lantshintshana indawo lele DeMbare layahlala kundawo yesibili lilemiklomelo engamatshumi amane lanye (41).
Iqembu le Dynamos lihlezi kundawo yesithathu lilemiklomelo engamatshumi amathathu lathoba munwe munye (39) kuthi kundawo yesine kuleqembu le Triangle elilemiklomelo engamatshumi amathathu lesikhombisa (37) ikanti kundawo yesihlanu kuhlezi iqembu le Harare City elilemiklomelo engamatshumi amathathu lane (34).
Kundawo yesithupha kutholakala iqembu le How Mine lona elilingene ngemiklomelo leqembu elikundawo yesikhombisa ele Caps United womabili lawamaqembu elemiklomelo engamatshumi amathathu lanye (31) iqembu ngalinye.
Iqembu le Hwange likundawo yethoba minwe mbili lilemiklomelo engamatshumi amabili lathoba munwe munye (29) okulinani elifana lelile qembu le Chapungu elihlezi kundawo yethoba munwe munye.
Kundawo yetshumi kuhlezi iqembu le Highlanders elitshaywe nge 1 ka nya ngele Harare City njalo elilemiklomelo engamatshumi amabili lanhlanu (25) kuthi ngaphansi kweqembu le Bosso kuleqembu le Buffaloes elilemiklomelo angamatshumi amabili lambili (22).
Iqembu le ZPC Kariba likundawo yetshumi lambili lilemiklomelo engamatshumi amabili lanye (21) njalo lilingene ngemiklomelo leqembu le Tsholotsho elihlezi ngaphansi kwalo.
Iqembu le Tsholotsho litshaye ele How Mine nge 2 ka 1 ngeSonto enkundleni ye White City njalo umqeqetshi walo uLizwe Sweswe uthi limpumela imupha ithemba lokuba leliqembu lizasinda ekugunyulweni kusigaba saphezulu ekupheleni kwesizini.
Kundawo yesithathu usuka ngaphansi kwengalane kuleqembu le Flame Lily elilemiklomelo elitshumi lathoba munwe munye (19) okulinani elilingene lelileqembu elihlezi ngaphansi kwalo ele Whawha kuthi ngaphansi kwengalane kuleqembu le Dongo Sawmills elilemiklomelo elitshumi lathoba minwe mbili (18).
....................................................
Kwezinye indaba ezimayelana lomdlalo wenguqu iqembu lamajaha aleminyaka engaphansi kwamatshumi amabili lantathu elimela ilizwe emidlalweni ye African Games linqobe ele Congo Brazzaville nge 1 ka nya emdlalweni walo wokucina owesibaya sika Group A kodwa loba kunjalo leliqembu alisoze lidlulele kusigaba esilandelayo esomncintiswano ngemva kokuba linqotshwe kumidlalo yalo emibili yakuqala.
Ngase Ngilandi iqembu le Chelsea okuyilo eliphethe isicoco seligi liqhubekela phambili lidonsa nzima njengoba linqotshwe nge 3 ka 1 ngele Everton okuyimpumela elitshiye lilemiklomelo emine ngemva kokudlala imidlalo emihlanu.
Phezu kwengalane kuhlezi iqembu le Manchester City lona elinqobe ele Crystal Palace nge 1 ka nya ngoMgqibelo njalo lilemiklomelo elitshumi lanhlanu.
Elizweni le South Africa iqembu eliphethe isicoco ele Kaizer Chiefs litshengisele ukuba lizimisele ukusivikela lapho libhaxabula ele Supersport nge 4 ka 1 ngoMgqibelo njalo lihlezi kundawo yesithathu engalaleni lilemiklomelo eyithoba minwe mbili ikanti amaqembu ahlezi phezu kwalo athi ele Bidvest Wits lele Ajax Cape Town alitshiya ngomklomelo owodwa.