Icele lebandla leCitizens Coalition for Change elikhokhelwa nguMnu. Albert Mhlanga lithi selixotshise edale leSenate amalunga eCCC afungiswe ngoLwesibili ukuba athathe izikhundla zalabo abaxotshiswa nguMnu. Sengezo Tshabangu abathi uzikhethele abantu laba hatshi uzulu.
Icele leli lilobele okhokhela idale leSenate limazisa ukuba sebexotshise uKucaca Phulu, Lilian Mlilo, Linda Sibanda loCollet Ndlovu. UPhulu ligwetha lika Tshabangu.
Olobe incwadi le uMnu. Dingilizwe Tshuma owayemela isigaba seEntumbane-Emakhandeni edale lephalamende uthe sokumele laba bexotshiswe loba bethethe ngoLwesibili izikhundla zohlelo lwe-proportional representation ezatshiywa ngabaxotshiswa nguTshabangu.
UTshuma ngumgcinisihlalo webandla leli. Okwamanje iCCC ikhokhelwa nguSikhwiamfundo Welshman Ncube, Tendai Bitii loLynette Karenyi Konye.
UMhlanga uthi benze umhlangano omkhulu koBulawayo bathatha isinqumo sokuxotshisa amalunga la. Uthi sokumele kukhethwe labo obekumele bengene edale leSenate.
Kodwa uTshabangu uthi inkomo ingazala umuntu ngoba lokhu akusoze kwenzakale. "Ilanga lingawa lidliwe zinkukhu nxa lokho kungenzakala."
Owayekhokhela ibandla leCCC uMnu. Nelson Chamisa walitshiya esithi selingenwe zimpehlane zebandla leZanu PF.
Forum