Imithetho ekhona emazweni amanengi ezwekazi leAfrica, edinga ukulawula ukuthelelwana kwegcikwane lengculaza, ibikwa incindezela abesifazana ngamandla, okuyibo abavame ukuzithola besetheswa amacala ngaphansi kwemithetho le.
NgoLwesine emhlanganweni omkhulu weInternational Conference on AIDS and STIs, osungule ngeSonto esigodlweni, bekuxoxiswana ngodaba lokusebenzisa imithetho ukuqeda ukumemetheka kwegcikwane lengculaza.
Bekuqhotshwa ithambo lokuthi amazwe alakho ukuqeda lumkhuhlane na, nxa kuseselemithetho engalunganga enqabela abantu ekutholeni usizo.
Igqwetha njalo engumqondisi wenhlanganiso yeAIDS and Rights Alliance of Southern Africa, uNkosikazi Michaela Clayton, uthi abesifazana yibo abazithola besetheswa amacala okuthelela omkabo igcikwane ngaphansi kwemithetho le, ngenxa yokuthi esikhathini esinengi yibo abahlolwa kuqala lapho bethe bazithwala.
Wengeze esithi kulusizi ngoba limithetho ibekwa kuthiwa izavikela abesifazana, kodwa eqinisweni ibatshaya ngoswazi oluphindiweyo.
Uthe, “Sokube lokubekwa kwemithetho eminengi yengculaza ebikhangelelwe ukukhangela konke okuphathelane lokuqeda lingculaza. Abesifazana yibo ababefuna limithetho kodwa yibo asebethwalise nzima yimithetho le.
“Lokhu kungenxa yokuthi abesifazana yibo abaqala ukwazi isimo sabo njalo yibo abethwesa icala emthethwandaba. Lesi yisibonelo semithetho ebekwa ilenjongo enhle yokuvikela amalungelo oluntu kodwa impumela yakhona ibe ngeyinye indlela.”
Igqwetha lamalungelo oluntu, uMnumzana Lizwe Jamela, owake wamela owesifazana emthemthwandaba esetheswa icala lokuthelela umkakhe igcikwane, uthi liqiniso ukuthi imithetho eminengi ephatha ukumemetheka kwengculaza, awuyifezi injoongo yayo.
EZimbabwe, umthetho olawula ukuthelela omunye igcikwane ngabomo, oweSexual Offences Act, uthi uyahlupha ngoba awucaci ukuthi lelicala lidalwa nxa kutheni.
Uthi sebeke bakhweza udaba lolu enkantolo ephezulu ukuthi kuhlaziywe ngoba akuvamanga ukuthi othelelweyo azi ukuthi lokhu kwenzakale nini, njani njalo abe lobufakazi bokuthi ubengelalo igcikwane lengculaza ngaphambilini kokuya emacansini lalowo athi umthelele.
Emhlanganweni weICASA ngoLwesine bekuxoxiswana njalo ngodaba lwengculaza labantu abagogekileyo, kunanzwa iInternational Day of the Disabled.
UNkosikazi Tilda Nkomo, ophila lobugoga, uthi kuqakathekile ukuthi babe yingxenye yengxoxo le ngoba okwakhathesi bavele ababonakali kunhlelo zokulwisana lalumkhuhlane.
Lapho bethe baqunga isibindi baya ezibhedlela ukuyabuza ngokuvikela emacansini, uthi baba yinhlekisa ngoba uzulu ecabanga ukuthi abalalo ilungelo lokuya emacansini.
Sokuke kwaba lamacala ambalwa akhwezwe emthethwandaba okuthelelwana igcikwane ngabomo kodwa kubenzima ukuthi kube lobufakazi.
Umhlangano we ICASA 2015, ususiya emaphethelweni , njalo ukhangelelwe ukuphetwa kusasa kusihlwa.
Lapho usiya phetha ukhangelelwe ukuba usuphathe inkulungwane lenkulungwane zengxoxo, ezimayelana lokutshiyeneyo okuphathelane lengculaza kanye lengulamakhwa.