Ibutho lesizwe selisize abantu bemaphandleni kuhlelo lokujova izakhamizi amajekiseni okwenqabela umkhuhlane we-COVID 19 endaweni ezigoqela iNtepe eGwanda.
Umsakazo weStudio 7 uvakatshele eNtepe ngoLwesithathu kuliviki lapho obekuxokozela esikolo seNtepe Primary izakhamizi zibuye ngobunengi bazo ukuzohlatshwa ijekiseni yokwenqabela i-COVID 19.
Izakhamizi esixoxe lazo zithi zithethe lelinyathelo kulandela ukumemetheka kwaleligciwane emaphandleni.
UMnu. Gift Sibanda osuka eCornerline eNtepe oleminyaka yokuzalwa engamatshumi amahlanu 50 ngomunye walabo abavuke emadabukakusa ngoLwesithathu ukuzohlatshwa.
UMnu. Bongani Ncube laye uthi uthethe inyathelo lelifanayo ukuze azivikele kumkhuhlane weCOVID 19.
UNkosikazi Betty Moyo osuka kosobhuku uMnu. Gift Moyo ngomunye wabahlatshwe ijekiseni le wakhuthaza ezinye izakhamizi ukuthi zithathe inyathelo elifanayo.
UNkosikazi Janet Jaji oweCornerline uthi kumethusile ukubona abantu bephela ngenxa yalumkhuhlane okubangele ukuthi azokwamukela lumjovo.
UKhansila weNtepe uMnu. Miclas Ndovu uthi uhlelo lwabebutho lokuhlaba izakhamizi zemaphandleni lusize kakhulu asebeluphele.
Ibutho liqale ukuhlaba uzulu wemaphandleni ijekiseni le kumaviki amabili edluleyo lincedisa abezempilakahle.
Sebefika phose inkulungwane ezilikhulu lamatshumi amathathu 129 340 abantu asebehlatshwe ijekiseni yakuqala yeCovid 19 eZansi yemaNdebeleni kwathi abedlula inkulungwane ezingamatshumi ayisitshiyangalombili 81 392 bahlatshwa eyesibili.
Kusenjalo abazali sebekhuthaze uhulumende ukuthi laye alungiselele ukuvulwa kwezikolo ngokukhangela indubo ezibhekane lababalisi ukuze abafundi bengafiki behlala njalo bengafundi.
UMnu. Gabriel Luphondo oyisakhamuzi seMawane uthi njengabazali bayakujabulela ukuvulwa kwezikolo.
UMqondisi wenhlanganiso yabababalisi eye Progressive Teacher’s Union of Zimbabwe eZansi yemaNdebeleni uMnu. Urgent Moyo uthi kuzakubanzima kubabalisi ukuthi babuyele ezikolo ngoMvulo.
UHulumende ubike kuliviki ukuthi abafundi abazabhala imihloliso lonyaka bazavula ngoMvulo kuthi abanye bavule ngoMvulo ozayo bavale sekulanda ikhisimusi.
