Uhulumende womanyano ukhangelelwe kunsukwana ezilandelayo ukuthi uzabumba iqula labantu elizaqondisa ukusebenza kwebhanga elikhulu lelizwe ele Reserve Bank of Zimbabwe.
Loba nje uMnu. Tendai Biti, umphathintambo wogatsha lukahulumende olubona ngezemali engafunanga ukukhuluma ngaloludaba, abakwaziyo ngalolu daba bathi kulengcwethi zenotho ezinjengo Mnu. Kombo Moyana ezizangena kuboard le.
U Moyana owayengusibalukhulu walelibhanga okweminyaka ethize ilizwe lisanda kuthola uzibuse, waziphumela engabangelanga nxabanxoza, ukhangelelwe ukuthi angene kuli board lo Mnu. Tony Hawkins we University of Zimbabwe School of Business Management, uMnu. Daniel Ndlela owaloba ugwalo olujulileyo lwenhlelo ze United Nations Development Program, uMnu. Godfrey Kanyenze weLabour and Economic Development Research Institute of Zimbabwe kanye lo Mnu. Charles Kuwaza umqondisi we State Procurement Board.
Abanye njalo abakhangelelwe ukuba ku board le nguMnu. Willard Manungo ongu Permanent Secretary kugatsha luka hulumende lwezemali, uNkosikazi Primrose Kurasha ongu Vice Chancellor we Zimbabwe Open University kanye lo Carrol Themba Khombe osanda kukhethwa ukuba ngomunye wabalwela amalungelo oluntu kuHuman Rights Commission.
Umnu. Simba Kuchera, ingcwethi ecubungula ezenotho utshele uGibbs Dube we Studio 7 ukuthi kungafakwa ingcitshi lezikhwicamfundo zenotho ku board ye RBZ, kusobala ukuthi ibhanga leli lilakho ukuthuthukisa inotho yelizwe.