Lanxa isikhulumeli seZanu PF uMnu Christopher Mutsvangwa esithi abafuni kukhuluma ngokuthi ngubani ozancintisa emele ibandla labo kukhetho luka2028, abacubungula ezombusazwe bathi ukungakhulumi ngodaba lolu kusalesikhathi kungaphehla ukulwisana okukhulu kuZanu PF okufana lalokho okubekhona ngesikhathi sikamuyi uMnu Robert Mugabe.
Ngalesosikhathi, kwakulwisana amacele eZanu PF amathathu; elalisekela uMnu Emmerson Mnangagwa, elalisekela uNkosikazi Joice Mujuru kanye lelinye elalisekela uNkosikazi Grace Mugabe.
Abasekeli bakaMongameli Mnangagwa esigabeni seMasvingo laseMidlands bafuna kwesulwe imigoqo yesisekelo sombuso ephoqa uMongameli welizwe ukuthi abuse okwamahlandla amabili kuphela ngoba bafuna uMnangagwa aqhubeke ebusa njalo abe nguye oncintisa emele iZanu PF ngo2028.
UMnangagwa yena useke watsho ukuthi akalanjongo yokwenza lokhu.
UMutsvangwa utshele iStudio 7 ukuthi bazakhuluma ngodaba lolu sokusele umnyaka nje ukuthi kuyiwe kukhetho.
Abanye abahlaziya ezombusazwe bathi umsekeli kaMnangagwa uMnu Constantino Chiwenga laye uyafuna ukuba nguMongameli.
Ngokunjalo, bathi kungaba lokudlephana phakathi kwakhe loMnangagwa alubana uMnangagwa ethe wazama ukuqhubeka egogodlele embusweni kanye lasesikhundleni sokuba ngumkhokheli weZanu PF.
Abazi ngokkwenzakalayo bathi akula kuhlaliseka kubandla elibusayo phezu kokuthi ngubani ozakwelama uMnangagwa ngokombuso.
Ocubungula ezombusazwe uMnu Effie Dlela Ncube utshele iStudio 7 ukuthi abasekeli beZanu PF labantu beZimbabwe nje jikelele kumele bekhulume ngodaba lolu bekhululekile ngoba kuludaba oluthinta wonke umuntu.
Forum