Ibandla leRepublican party selinqobile kuSenate yeMelika selithole izihlalo ezinengi okuzakupha osanda kukhethwa ukuba ngumongameli uMnu Donald Trump amandla okufaka imithetho emitsha lingadingi usekelo lwebandla leDemocratic Party.
Ibandla leRepublican Party selinqobile lathatha izihlalo zeSenate ezinengi, kungokwakuqala kuminyaka emine.
“Lolu lusuku olukhulu kubandla leRepublican Party!” kutsho uMnu. Mitch McConnell, okhokhela amalunga eSenate akubandla lamaRepublicans.
Ibandla leli linqobe esigabeni esiqakathekileyo ebesikhangelelwe esePennsylvania.
“Kukhanya sengathi sisendleleni eyiyo," kutsho osanda kukhethwa ukungena kuSenate owebandla leRepublican Party uMnu David McCormick.
ETexas, owebandla leDemocratic Party uColin Allred wehlulekile ukunqoba owebandla leRepublican Party uTed Cruz.
“Ngizalwela lina, imisebenzi yenu, ukuvikelwa kwenu kanye lamalungelo enu,” kutsho uSenetha Ted Cruz.
Bekukhethwa njalo abazathatha izihlalo zonke ezingamakhulu amane lamatshumi amathathu lanhlanu, 435 ezeHouse of Representatives, ibandla leRepublican Party likhangelelwe ukuqhubeka likhokhela kulelidale.
Kukhetho lweSenate, Ibandla leDemocratic Party lithethe iCalifornia.
“Ngizinikele ukulwa ngivikela inkululeko yethu kanye lozibuse,” kutsho osanda kukhethwa ukuthi angene kuSenate emele ibandla leDemocratic Party uMnu Adam Schiff.
Izigaba ezimbalwa ebezingaziwa ukuthi zizavotela liphi ibandla yizo eziveze ukuthi ibandla elizakhokhela eSenate yiliphi. Lezi yizigaba ezifana leOhio kanye leMontana, lapho owebandla leRepublican Party uTim Sheehy anqobe obephethe isigaba lesi owebandla leDemocratiic Party uSenator Jon Tester.
Ukukhokhela kwebandla leRepublican Party eSenate, kupha uTrump amandla okuthi akhethe abazakhokhela inkantolo yaphezulu eyeSupreme Court, njalo kwenza kubelula ukufaka imithetho yakhe.
“Ngenxa yalokhu uDonald Trump, uzakwenelisa ukufaka abaphathintambo bakhe kanye labasekeli bakhe engazange adinge usekelo lwabameli bebandla leDemocratic Party. Kulabakhokheli abanengi azakwenelisa ukubakhetha ikhakhulu enkantolo,” kutsho uMnu Casey Burgat, ingcwethi ecubungula ezombusazwe eyekolitshi leGeorge Washington University.
Ibandla leRepublican Party lacina ukukhokhela iCongress kuminyaka emibili eyokuqala kobukhokheli bekaTrump ngo2017.
Forum