Owayengumsekeli kamongameli, uNkosikazi, Joice Mujuru, ele Zimbabwe People First lithi lanxa lingazihluphi ngodaba oluphume ephephandabeni le Sunday Mail luhlambaza uMujuru lidaniswa yikuswelakala kokusebenza ngokuqotho okwenziwa zintathelizindaba zaleliphephandaba.
Udaba olulesihloko esithi ukuchaya udokotela Mujuru leliphephandaba lithi kazange alwe impi kumbe ukuwisa indizamtshina okuthiwa wakwenza kodwa wayesebenzisa icansi ukuthi adinge izikhundla.
Leliphephandaba lithi laxoxa lowalwa impi yenkululeko, uMnu. George Rutanhire othi uMujuru wabulalisa abantu abanengi ngokuthanda icansi.
Kodwa esinye isiphathamandla sebendla le ZimPF, uMnu. Methuseli Moyo utshele iStudio Seven ukuthi ugatsha lwezemithetho lusahluzisisa loludaba ukuze libone ukuthi lizathatha nyathelo bani.
"Thina njengebandla le Zimbabwe People First lokhu esikubonileyo emaphephandabeni kahulumende akusimangalisi ngoba vele iZanu PF nxa isisebunzimeni, isibona ukuthi isikhululelwa nge politics iyasuka iyekwenza ezinye izinto esithi ngesilungi yi dirty politics," kutsho uMoyo.
