Ibandla lezombusazwe elisanda ukubunjwa ele Freedom of Rights under Sovereignty - FORUS ngoMgqibelo lethulele umphakathi ibhuku elimumethe iziqondiso zalo eleManifesto ngesikhathi lilungiselela ukhetho lomnyaka ka 2023.
Esethula umbiko wakhe emahofisini alelibandla eBelvedere e Harare, umkhokheli walelibandla uNkosazana Manyara Ireen Muyenziwa utshele umbuthano wabalungiselela ukuncintisa kuzikhundla zokuba ngamalunga edale lephalamende kanye lakubomanisipala, ukuthi akumjabulisi yena lebandla lakhe ukuthi izizalwane zeZimbabwe ezikwamanye amazwe ziqhubeka zisenqatshelwa ukuphatheka kukhetho.
Uthembise ukuthi lolu ludaba asezaluhambela emahofisini atshiyeneyo kunsukwana ezilandelayo.
UMnu. Picolius Sibanda, ofuna ukuncintisa kusikhundla sokuba ngumeli wesigaba se Bulawayo ephalamende ulandisa ngokubangele ukuthi abe yingxenye yalelibandla.
Isakhamuzi seKambuzuma edolobheni le Harare uMnumzana Moses Ngwenya uthi ufisa kufezeke konke okufunwa yilelibandla lokumunyethwe lugwalo lweManifesto yalo.
Ugwalo lolu lubeka sobala inhlelo zalelibandla ezokulungisa umnotho welizwe, ukulondoloza ilungelo loluntu, ezokulima, ezokwemba amatshe aligugu, ukusungulwa kwemisebenzi, ezemfundo, ukuguquka kwezomkhathi i-climate change, ukuthwalwa kwempahla kanye lokunye okunenginengi okuphathelane lentuthuthuko yelizwe.
