Abezindaba abeReuters babika ukuba ingxenye yempumela yokhetho oluqhutshwe izolo kwele South Africa iveza ukuba ibandla leAfrican National Congress lithwele nzima kukhetho lolu, okungenza ukuthi libambisane lamanye ukuze kubunjwe uhulumende omutsha.
Lokhu akukaze kwenzakale selokhu kwasuswa umbuso wabamhlophe owoncindezelo ngomnyaka ka1994. Okwethulwe yikhomishini ebona ngezokhetho eyeIndependent Electoral Commission of South Africa kuveza ukuba ibandla leANC okwamanje lilamavoti ayisilinganiso esedlula kancane okungamatshumi amane ekhulwini – 43.4%.
Ibandla leDemocratic Alliance lona selithole amavoti ayisilinganiso sokwedlula kancane amatshumi amabili lane ekhulwini – 24.9%.
Kuthi-ke ibandla leEconomic Freedom Fighters lona lilamavoti ayisilinganiso esifika phose itshumi ekhulwini – 8.8%. Umkhonto Wesizwe iyalandela ngamavoti aphose afane lawe EFF.
Lungaphetha ukhetho lolu lunje, ingcwethi ezombusawe zithi ibandla leANC kuzamele likhulumisane laphikisayo ukuze kubunjwe uhulumende omutsha. Kuzakwethulwa impumela egcweleyo yokhetho lolu ngempelaviki.
Akwaziwa ukuba kuzakwenzakalani kobengumongameli uMnu. Cyril Ramaphosa. Loba kunjalo, kambe kukhona na okuqutshwe kuhle kukhetho lolu njalo eleZimbabwe lingafundani kulokhu.
Ukuze sihlaziye udaba lolu, sixoxe loMnu. Effie Dlela Ncube okunhlanganiso yeConsumer Rights Association of Zimbabwe loMnu. Ngqabutho Mabhena okubandla leCommunist Party of Zimbabwe.
Forum