Ibandla leMovement for Democratic Change elikhokhelwa nguMnu. Nelson Chamisa namuhla limgcobe ukuba ngumongameli welizwe leZimbabwe.
Ibandla lele lenze lokhu eGwanzura Stadium eHarare ngesikhathi lithakazelela iminyaka phose engamatshumi ababili – 19 – labunjwa.
UChamisa ugcotshwe nguMnu. Morgen Komichi omunye wabasekeli baka Chamisa othe, “UNelson Chamisa sesimgcobe ukuthi abengumongameli welizwe leZimbabwe. Ungumongameli wabantu.”
Ukugcotshwa kukamongameli kwele Zimbabwe kwenziwa nguChief Justice kumbe umsekeli wakhe.
UMongameli Emmerson Mnangagwa wagcotshwa ukuba nguMongameli nguChief Justice Luke Malaba umthethwandaba usanda kwethula ukuthi nguye owanqoba kukhetho ngoNtulikazi lonyaka. UChamisa waphenyeka udaba lolu emthethwandaba esithi nguye owanqobayo.
UNkosazana Thabitha Khumalo, umgcinisihlalo webandla leli, uthi uChamisa ugcotshwe ngabantu hatshi umthethwandaba.
Kodwa-ke uMnu. Joseph Tshuma webandla leZanu PF uthi yikuganga lokhu okwenziwe libandla leMDC elikhokhelwa nguChamisa.
Ilizwe leZimbabwe okwamanje libhekane lenhlupho ezitshiyeneyo okugoqela ukuswelakala kwemali lempahla, ukuqonga kwentengo yempahla lokusilela kwamafutha okupheka lawezimota.
