Izakhamizi ze Chitungwiza zibonga ibandla lenkonzo lamaSabata ele Seventh Day Adventist ngokuphathisa idolobho lelo ngesikhathi zibhekane lenkinga kunye lobunzima empilweni zabo.
Umqondisi we Chitungwiza Residents Trust umnumzana Marvelous Khumalo emele izakhamizi zalelidolobho kunye lendawo ezigombozeleyo okugoqela i-Manyame uze emavinkilini awe Chitungwiza Town Centre ngenhloso yokuzobonga ibandla lamaSabata ngokuphathisa ukwelapha abantu abedlula inkulungwane ezingamatshumi amabili kungela mbadalo, bemba lezibhorane ezilitshumi lambili ngesikhathi lelidolobho libhekane lobunzima bokusilela kwamanzi.
Ngezikhathi ezinengi uthi abantu abenelisi ukubhadalela ukwelatshwa ngoba izibhedlela sezidula njalo lama kilinika engasebenzi kakuhle ngokusilela kwemithi. Izisebenzi zamakhilinika lazo sezileminyaka embili zingatholi iholo kakuhle okuphazamisa ukusebenza kwazo ethi kuqakathekile ukuba imisebenzi efana leyaleli sonto ibongwe:
Umnumzana Jacob Rukweza oyisakhamuzi se Chitungwiza uthi ujabule kakhulu ukubona imisebenzi enje isenzakala ikakhulu ukulungisiswa okwenzwe eyinye i-ward esibhedlela esikhulu se Chitungwiza ngokuphathiswa yilisonto ethi isifiso ngesokuba amanye amasonto lawo ephathise kanje:
Ibandla lenkonzo ele Seventh Day Adventist libe le Crusade enkulu ephele ngoMgqibelo ehlanganisele imisebenzi yokuhlolwa, ukwelatshwa lokunikezwa kwemithi kuzigulane kungelambadalo eChitungwiza Town Centre engenwe langumongameli walelibandla emhlabeni jikelele umnumzana Ted Wilson.
Idolobho le Chitungwiza libikwa lilesikwelede esifika kuzigidi ezingamatshumi amahlanu lane zxamadollar-$54 million izigidi ezine zalesi sikwelede kungesamanzi kumasipala weHarare lapho eliwathola khona njalo lihlala livalela izakhamizi amanzi.