Abadabuka eZimbabwe abaphila ngokuthengisa emigwaqweni kwele Botswana badlela evalweni ngemva kokuba amalunga elinye ibandla lezombusazwe eliphikisayo lisungule umkhankaso wokuthi basuswe lapho abathengisela khona badedele izizalwane zakwele Botswana.
Ilunga lebandla eliphikisayo eleBotswana Congress Party kumbe iB-C-P, uMnu. Sedirwa Kgoroba, uselobele uhulumende ukuthi asuse bonke abokuza abakubhizimusi lokuthengisa emigwaqweni.
UKgoroba uthi uma uhulumende engathathi inyathelo phezu kwaloludaba, ibandla lakhe leB-C-P lizangena emigwaqweni litshengisele.
UKgoroba wake wabalilunga ledale lephalamende njalo ukhankasela ukubuyela kulesi sikhundla kukhetho lwesizwe oluzaqhutshwa ngoMfumfu.
“Kulomthetho othi le ibhizimusi yokuthengisa ezitaladeni ngeyezizalwane zeBotswana kuphela. Manje sesibona sebebangisana labokuza ikakhulu abeZimbabwe. Sithi kuhulumende wethu sekuyisikhathi ukuthi lokhu kulungisiswe. ”
UKgoroba uthi ayisikho ukuthi balwa labantu abadabuka eZimbabwe kodwa kumele bazwisise ukuthi abeBotswana labo bazama ukuziphilisa ngokuthengisa emigwaqweni.
“Ngabe sithi abeBotswana abafuni ukungena kule bhizimisu, manje akunjalo. Yikho sisithi uhulumende kangenele. Uma enganelanga silejongo yokuthi singene ezitaladeni sitshengisele.”
Indawo yeMogoditshane, engumuzi ongaphandle nje ledolobho leGaborone, yiwo obhekane kakhulu ludubo lolu, kutsho uKgoroba.
Esinye isizalwane seBotswana esiphila ngokuthengisa emigwaqweni yeMogoditshane, uNkosazana Kesaobaka Kesekile, uthi uyasekela imizamo yokubaphathisa phezu kwaloludaba.
“Abasincede sibili ngoba sekucina kusivalela phandle thina khonapho sihlawulela lencwadi zama layisensi. Abanye babo sebehamba bethengisa lezindlini.”
Inengi labeZimbabwe liphila ngemsebenzi efana lokuthengisa emigwaqweni, ukutshaya izitina, ukuthunga kanye lemsebenzi yokunusela, yona uhulumende othi kumele ibe sezandleni zezizalwane zeBotswana kuphela.
Okunhlanganiso yabe Zimbabwe kwele Botswana, uMnunzana Cephas Tshuma, uthi noma nje evumelana lezikhalazo zezizalwane zeBotswana, kumele loludaba lukhangelwe ngelinye ilihlo lokukhalipha.
“Khona bakhuluma umcijo, kodwa ungakhengela ukuthi kulabanye abayabe besenza amacala. Nangu umuntu othi wothi ngiphile ngokuthengisa, kambe kuhle ukuthi abesedudulwa. Akumelanga abantu bezithathele umthetho bewufake ezandleni zabo.”
AbeZimbabwe abaphuma phandle kwelizwe bengena emazweni ikakhulu angomakhelwane, sebethola ukuthi amathuba okuziphilisa asenciphile.
Kwele South Africa, amanye amabandla akhankasela ukhetho olusanda kwedlula ngokuthi azabuyisela emuva abangena kulelozwe ngokungekho emthethweni ngoba becina bethathela izizalwane zalelolizwe imsebenzi, kukanti abanye badala amacala.
Forum