Izizalwane zeZimbabwe ezinengi zithi uMongameli Robert Mugabe kumele alalele isicebiso sikaMongameli Ian Khama weBotswana othi kumele asuke embusweni.
Abantu makhaza esikhulume labo labanye njalo abaphendule imbuzo ebulenjini bokuzilibazisa obe VOA Ndebele laku VOA Studio 7 Facebook bathe uKhama uyitshaye ekhaleni.
Phakathi kwabantu abedlula ikhulu lamatshumi amathathu – 130 – abaphendule imbuzo yethu, inengi labo lithe uKhama ukhuluma okufiswa nguzulu eZimbabwe.
Kodwa-ke abanye abambalwa bathe akumelanga uKhama angenele okwenzakala eZimbabwe.
Abangasafuni umbuso kaMugabe bathe bazaqhubeka betshengisela ezitaladini njoba akusaphileki eZimbabwe lapho okungasatholakali khona imisebenzi.
Bagcizelele besithi isikhathi sesifikile esokuthi uMugabe atshiye umsebenzi. Bathe kusobala ukuthi uMugabe uzazondiswa yilokho okukhulunywe nguKhama.
Kasenelisanga ukukhuluma loMnu. Simon Khaya Moyo, isikhulumeli sebandla leZanu PF ngodaba lolu.
Ukuze sihlaziye okukhulunywe nguKhama, sixhume uMnu. Joseph Tshuma, omele iPelandaba-Mpopoma kudale lephalamende njalo okudale leCentral Committee kubandla leZanu PF, loMnu. Vusumuzi Ncube, olilunga leMDC-T eBhilithane.
UTshuma uthe uKhama ukhuluma angakwaziyo njalo wenza engani kakwazi ukuthi kumele inkokheli zikhulumisane njani ngendaba ezinje.
UNcube uthe uTshuma utshaya iganga loba ekwazi ukuthi uMugabe usebhidlize ilizwe leZimbabwe.
