Ugatsha lomanyano weAfrican Union olubona ngokulwisana lenhlupho ezibangelwa yikuguquka komkhathi olweAfrica Risk Capacity namuhla luphe eleZimbabwe imali edlula kancane izigidi ezingamatshumi amathathu, US$32 million, yokulwisana lendlala, yona eqhubeka ihlasela ngamandla elizweni.
Ekhuluma ngemva kokwamukela lolusizo kumbuthano oqhutshelwe eHarare umphathintambo obona ngezemali uMnu Mthuli Ncube uthe limali izasetshenziswa ukudingela abantu abalambayo ukudla ezigabeni ezingamatshumi phose amathathu, 27, ezigoqela eTsholotsho, Lupane, Hwange, Nkayi, uMzingwane, Binga, Mangwe, Beitbridge, Insiza, Gwanda, Matobo, Chimanimani, Mount Darwin, Rushinga, Mbire, Mudzi, Kariba, Chiredzi, Mwenezi, Masvingo, Zaka, Zvishavane, Gokwe North leMberengwa.
“Imali le ngeyokuvikela labo abasengozini yendlala yalonyaka. Sithole i32 million US dollars ukuze silwisane lendla esibhekane layo lonyaka.”
Lanxa kulabantu abayizigidi eziyisitshiyagalolunye, 9 million, abalambayo abadinga ukudla ngesiphangiphangi eZimbabwe yonke, imali evele kuAfrica Risk Capacity le izaphathisa imuli ezedlula kancane ingxenye yesigidi, 509,000, kuphela.
Kodwa uNcube uthi loba kunjalo, usizo lolu luzadlala indima enkulu.
“Imizi le isindaweni ezehlukeneyo. Imali ezatholwa ngabantu izabe ithe xaxa. Sizaqhubeka sidinga ukuba sithole usizo ukuze ezinye indawo zithole imali.”
Phakathi kweUS$32 million le, uhulumende weZimbabwe uzasebenzisa izigidi ezedlula ezilitshumi lasithupha, US$16, 825, 634, kuthi inhlanganiso yeWorld Food Program, yona ephatheke kunhlelo zokuphathisa abalambayo eZimbabwe izaphiwa izigidi ezedlula kancane eziyisithupha, US$6,091,377. Inhlanganiso yeStar Network, yona ephathisa abalambayo eMatabeleland South, Midlands, leMasvingo izaphiwa izigidi eziyisitshiyalambili, US$8, 979, 773.
Isiphathamandla senhlanganiso yeWorld Food Program uMnu Fransesca Elderman laye wamukele lolusizo ngenjabulo esithi luzaphathisa kakhulu.
“Imali le izancedisa ngoba vele indlala yalonyaka ifuna ukuba sidonse ndawonye ukuze siyinqobe. Akula ozenelisa ukuyiqeda eyedwa.”
Ingcitshi kundaba zokuphiwa kwabantu ukudla zithi kumele ukudla lokhu kuphiwe abantu bonke abadubekayo elizweni kungelani lokuba basekela liphi ibandla lezombusazwe.
Omunye wabalombono lo nguMnu Vezigama Tshuma owake wasebenzela inhlanganiso yeWorld Vision.
“Ukuphiwa kokudla lokhu kumele kwenziwa kungakhangelwa mbala loba isibongo somuntu. Kumele badingisise abantu abaswelayo ngoba lonyaka kulendlala enzima.”
UMongameli Emmerson Mnangagwa, ekhuluma izolo, uthe kuyadingeka ukuthi uhulumende abambane lenhlanganiso ezizimeleyo ekulwisaneni lendlala lokuthi kutholakale ukudla okuzaphiwa abantwana besikolo.
Amazwi la amukelwe ngabazali abanengi abathi abantwana bathwele nzima ngokuya esikolo belambile. Omunye wabo nguMnu Mlindelwa Ncube.
“Abantwana abanengi sebesehluleka ukuqeda isikhathi eside besezikolo ngenxa yendlala leyi. Uhlelo lolu siyalwamukela njalo sithemba luyaqeda udubo lwendlala.”
Kunyanga ezisanda kwedlula uhulumende wethule isicelo semali ephezu kwamabhiliyoni amathathu, US$3.3 billion, yokudingela abalambayo ukudla. Lanxa abanye sebeqalile ukuphiwa lokhu kudla, inengi alikakutholi.
Forum