Ikomishini ebona ngokuqhutshwa kokhetho eyeZimbabwe Electoral Commission ithi ayilamandla okubizela ukhetho, lwama by-elections ngoba uMongameli Mugabe engakazisi ukuthi ukhetho lolu kumele lwenziwe.
I ZEC iveze lokhu kugwalo lwayo lokuzivikela emthethwandaba weHigh Court koBulawayo kulandela ukusiwa kwayo kulumthethwandaba ngabathathu abamiswa nyakenye ukuba ngamalunga edale lephalamende ngemva kokuxotshwa kwabo kucele leMDC elikhokhelwa nguMnu Arthur Mutambara.
Abathathu laba nguMnu Abednico Bhebhe, uMnu Njabuliso Mguni loMnu Norman Mpofu. I ZEC ithi ukuze ukhetho lwama by-elections endaweni ezazimelwa ngabathathu laba ephalamende lwenziwe, kumele uMongameli welizwe abe nguye okutshoyo lokhu. Ngalokhu iZEC ithi, isicelo sikaBhebhe labanye bakhe kumele silahlwe lidale.
UMugabe yena ucele ukwengezelelwa amalanga ngoLwesithathu esithi usahluzisisa udaba lolu. Igqwetha lika Bhebhe labanye bakhe uMnu Matshobana Ncube uthi bafuna uMugabe abizele lolukhetho ngokuphangisa.
Ingcwethi ecubungula ezombusazwe uMnu Effie Dlela Ncube uthi lanxa nje oBhebhe belungile ngokuya emthethwandaba, kunzima ukuthi ukhetho lwenziwe okwamanje ngoba umthetho ophathelane lezokhetho oweZimbabwe Electoral Act usalungisiswa.
