Inhlanganiso elwisana lobudlwangudlwangu lokufumbathisana eye Transparency International Zimbabwe ithi inhlolisiso yayo ikhomba ukuba abatsha bazibona bengenelisi ukuphathisa ekwehlisweni komkhuba wobudlwangudlwangu elizweni.
Emhlanganweni wayo wokwazisa ngempumela yenhlolisiso kuloludaba owenzelwe eHarare ngoLwesibili inhlanganiso yazise ukuba abatsha abanengi abanikezwa imbuzo yokuphendula kuloludaba bakhetha ukungaiphenduli bethi udaba lobudlwangudlwangu alusinto abengenelisa ukuluqeda lokuzihlupha ngalo ngokutsho kuka Cheryl Khuphe obona ngezokwethulwa kwembiko kulinhlanganiso:
Omunye wabaquba linhlolisiso umnumzana Farai Mutondoro uthi kukhanya kudingakala ukuba abasakhulayo bafundiswe ngokugcweleyo okumayelana lokuba ubugcwelegcwele kuyini ngoba inengi labo licabanga ukuba kutsho ukufumbathisana kuphela njalo bengazwisisi ukuba imithetho ekhona kuloludaba imi kanjani. Uthi izabelo zase Mandebeleni zikhanya zilokukhonona kakhulu ngobugwelegwele obuhambelana lendimi kumisebenzi yamapolisa lakwezemidlalo:
Unkosazana Khuphe uthi ngendlela loludaba olumi ngalo abatsha bathi bangazihluphelani ngokulandela indlela abathi zinzima ukwazisa ngobugwelegwele bengasoze bethole lutho kikho ethi sebejonge ukufundisana labatsha ukuba bazi ukuqakatheka kokulwisana lesifo esinje:
Umqondisi we nhlanganiso we Youth Initiative For Democracy umnumzana Sydney Chisi uthe abatsha lokhe besalela muva kuntuthuko kungenani lemizamo kahulumende yokubathuthukisa ethi kuqakathekile ukuba kube lokusebenza ngokusegcekeni kudaba lwendlela abatsha abaphathiswa ngayo yisikhwama sabatsha ese Youth Development Fund ethi abatsha bamele bephatheke labo kumisebenzi yama private public partnerships kulokwenza imisebenzi engelanzuzo ezwayo eyiyona abayenzayo okwamanje.
Lumhlangano ungenwe langenhlanganiso zabatsha ezigoqela I ZINASU, Female Students Network le Africa Youth Transformation Network phakathi kwezinye.