Iqembu leNdolwane Super Sounds selethule indlikizane yedlalade elilesihloko esithi "Zethembe."
Abakhokheli baleli qembu, uMartin Sibanda loCharles Ndebele bathi idlalade labo leli, elingeletshumi lanhlanu, ngumcaba ophothulwe ngezankefu zamasi.
Ziyisithupha ingoma ezikuleli dlalade. USibanda loNdebele bathi zonke lezi ngoma ziyakha, ziyalaya, ziyafundisa kanti njalo ziyaxwayisa. Eyakuqala yiyo ephethe isihloko sedlalade isithi, Zethembe.
Umlobi wengoma le, njalo engomunye wabasungula iqembu leNdolwane Super Sounds, uMartin Sibanda ithi baphe idlalade leli isihloko sokuthi "Zethembe" ngenjongo yokukhuthaza uzulu ukuthi angaze azeyisa.
Leli qembu sekuntolontolo labakhona kwezokucula njalo ngelinye lamaqembu abusayo ezansi yezwekazi leAfrica kumdumo weRhumba. Abafana abadabuka esiKalangeni laba bakhithize idlalade labo lakuqala ngo 1993 sebezinjiva eGoli.
Kusukela lapho sebethule amadlalade alitshumi lanhlanu. Eliphunyuzwe ngelitsha leli ngebelilesihloko esithi "Ukungafiki" njalo angemva kwalo atshiye inengi amazwane esubukile agoqela oNqokonqoko kanye labo Maginqigonqo.
