Idale leHigh Court koBulawayo seledlulisele kuviki ezayo isicelo sikaMnu Abednico Bhebhe owayengumqoqi wenhlelo kubandla leMDC-T esokumisa umhlangano omkhulu oweCongress webandla lelo, NgoMqgibelo kusakhangelwa isicelo sakhe sokubuyiselwa esikhundleni sakhe.
Umthethwandaba waphezulu weHigh Court uthethe leli nyathelo ngoba amagwetha ebandla leMDC-T abike ukuba athole amaphepha okuphanyekwa kwalesi sicelo edale ngoLwesibili.
Amagqwetha kaBhebhe laweMDC-T acine evumelene ukuba isikhathi abathole ngaso amaphepha abenze behluleke ukulungiselela kakuhle.
Ingqwetha likaBhebhe, uMnu Nqobani Sithole uchasisa impumela yeHigh Court.
“Bacele ukuba lidluliselwe kwelinye ilanga ngakho lathi sikubonile ukuba amaphepha bawathole izolo ngama11 njalo uma belesicelo lesi sile merit. Esikunanzelelayo yikuthi ucongress izabakhona ngesabatha uJudge uthe uthe icala liyangena ngeviki ezayo ngakhoke iyabe isidlulile icongress kodwa uBaba uBhebhe ulecebo afuna ukulenza. Ujudge ozangena kuviki ezayo nguye ozaphawula ilanga lokuthi iyangena nini..”
UBhebhe ephuma edale wamukele ukuphathwa kwesicelo sakhe, ethi “Sekuqalisile ukusetshenzwa sizasebenza thina siyahlonipha ukuthi umthethwandaba utheni njalo siyakholwa ukuthi uma sisebenza sisebenze ngendlela eqondileyo engela bumenemene njalo sizakwenza okusemandleni ethu ukuthi ibone ukuba udaba lolu luyalungisiswa ngokuqondileyo njalo okusemthethweni.”
Ingqwetha leMDC-T, uMnu Tawanda Tavengwa yena uthi, “Amarespondants acele ukuba udaba lolu ludluliselwe phambili ngoba amaphepha edale aphuzile ukufika izolo ngakho abazange bathole ithuba lokuthi balungise amaphepha abo okuthi baphendule uBhebhe ledale. Idale lithe icala selizangena kuviki ezayo ngemva kwecongress yeMDC-T.”
UBhebhe ucala inkokheli yeMDC-T ukuba ayilandelanga isisekelo sebandla ukumkhupha esikhundleni sakhe ayelaso ngomnyaka ka2014 sokuba ngunobhala obona ngokuqoqwa kwnehlelo, uOrganising Secretary njalo ubecele idale ukuba limise icongress yeMDC-T ekhangelelwe ukubakhona NgoMgqibelo udaba lwakhe luze luthonisiswe luphele.
