Ingcwethi kwezempilakahle eZimbabwe zithi azikabi layo incazelo yokuba kungani inani labantu abatholakala beleCovid 19 kungabemadolobheni amakhulu aweHarare leBulawayo.
Baqhubeka bexwayisa uzulu ilizwe lonke jikelele ukuba aqhubeke elondoloza ukuhlanzeka lokuzivikela ekuthelelweni leli gcikwane ngoba umkhuhlane usakhona elizweni ungakapheli, kufakazwa yimpumela yalabo abahlolwa igazi kusetshenziswa indlela ye Polymerase Chain Reaction – PCR.
Enye ingcwethi kwezempilakahle uDokotela Xolani Ndlovu ukhumbuza uzulu ngakumele akwenze ukuzivikela kulomkhuhlane phansi kweziqondiso zenhlanganiso ebona ngezempilakahle umhlaba wonke eye World Health Organisation – WHO lezabekwa nguhulumende.
“Abantu jikelele bayakhuthazwa ukuthi bahlale ezindlini uma kungela sizatho esibalulekileyo ukuthi umuntu aphume phandle. Uma kulento eyenza ukuthi kudingeka ukuthi aphume phandle, kufanele ukuthi umuntu wonke afake imask. ”
Abebandla lezombusazwe abe People’s Democratic Party – PDP ekhokhelwa nguNkosikazi Lucia Matibenga baxwayisa uzulu ukuthi angayekethisi ekuzivikileni ukuthelelwa lumkhuhlane ngoba kawukhethi ukuba usekela liphi ibandla.
Isikhulumeli se PDP umnumzana Nqobizitha uKhumalo ulandisa kabanzi ngalokho.
“Enye into ekhona, ngamabandla okholo labanye abantu abazenza odokotela ezitaladeni. Laba bantu bathi hayi isifo lesi sibamba abelungu, ayisiso sabantu abamnyama. Ngiyabezwa abantu abanengi bekukhuluma khonokho besithi abelungu badla inyama enengi, abamnyama kabadli nyama enengi yikho bengaguli ngakho, abanye bathi hayi kuyaqanda. Sekukhulunywa okunengi njalo abanye bathi hayi abelungu bathukwe nguNkulunkulu ngoba basinika amaSanctions kumbe lokhu lalokhuya. Konke khonokho, yimfundiso embi ebanga ukufa kwabantu ngendaba zeCOVID.”
Omunye wabasinde kulomkhuhlane enyangeni ezimbalwa ezedlule yintathelizindaba esebenza izimele u Kudzai Madzivire yena oleminyaka engamatshumi amabili lathoba munwe munye – 29 yokuzalwa uthi lanxa usubanjwe ulegcikwane qhubeka ulondoloza ukuhlanzeka uvikele abaseduzane lawe.
“Abantu kumele bafune ukuba lumkhuhlane akusikho sigwebo sokufa. Ulakho ukuphila uqhubeke ngempilo yakho uma ungalandela indlela esixwayisa ngayo ukuba sisebenzise uma sizithola sesihlaselwe yileligciwane. Isifiso sami ngesokuba ngibe yisibonelo ukuthi leligciwane liyalwiseka njalo ungqobe. Ngingathi kusalomsebenzi omkhulu ukuntshintsha lumcabango kuzulu. ”
Ngesikhathi loludaba lulotshwa bebesedlula kancane inkulungwane eziyitshiyagalombili ( 8 303 ) asebetholakale belalomkhuhlane eZimbabwe , abafika phose inkulungwane ezithobaminwe mibili ( 7 797 ) bakhona kungasebasinda kiwo kuthi abangamakhulu amabili lamatshumi amane lambili bakhona ( 242 ) kungasebalahlekelwa yimiphefumulo.
Lokhu kusitsho ukuba, kunani labatholakale belawo lumkhuhlane, abangamakhulu amabili alamatshumi ayisithupha lane ( 264 ) kungabalokhe besalawo.