Ikomidi ebona ngokulotshwa kwesisekelo sombuso esitsha ithi udaba lwamalungelo ezitabane alusoze lungene kugwalo oluzahanjiswa kuzulu, nge-referendum ngoba abantu bekubeke sobala ukuthi abafuni lakulubona loludaba kusisekelo sombuso.
Omunye wabagcinisihlalo beCopac, uMnu Edward Mkhosi owecele leMDC elikhokhelwa nguMnu Welshman Ncube uthi lazo izitabane azizange ziphumele egcekeni ngezifiso zazo ngesikhathi kubuthaniswa imbono kazulu.
Kodwa inhlanganiso yezitabane iGays and Lesbians of Zimbabwe uthi imbiko le ingamanga.
Uzulu weZimbabwe uhlezi esekela uMongameli Robert Mugabe ekuthini izitabane zinganikwa amalungelo phansi kwemithetho yeZimbabwe.
Kunjalo nje, uMkhosi ulandube imbiko ekhitshwe ngumsakazo weZBC yokuthi yena labanye banye kuCopac bahudula izinyawo ngabomu kudaba lwesisekelo sombuso ngoba bethola imali enengi kuloluhlelo.
I ZBC ithi abagcinisihlalo beCopac bahola inkulungwane eyodwa lengxenye, $1, 500 ngelanga.
Kodwa uMkhosi uthi la ngamanga, esithi bathola i $75. 00 kuphela ngamunye njalo imali le bayithola nxa bethe basebenza, hatshi nsuku zonke.
