Ugatsha lwezemidlalo lokuzilibazisa luthi ukubunjwa kwamaqembu ezemidlalo agxile emphakathini yikho okuzakwenza ukuba ilizwe liphumelele kumcintiswano lamanye amazwe.
Ekhuluma labameli benhlanganiso zemidlalo eyehlukeneyo ngesikhathi esethula uhlelo lwe Community Sport and Recreation edolobheni lako Bulawayo ngenyanga kaNhlolanja, umphathintambo wogatsha lwezemidlalo lokuzilibazisa uMakhosini Hlongwane, uthe imbangela yokuba ilizwe lingaqhubi kuhle kwezemidlalo yikuba akula nhlelo ezokuthapha ithalenta ezigoqela umuntu wonke.
“Ukuswelakala kwenhlelo ezicacileyo kunhlanganiso ezibona ngokuqhutshwa kwezemidlalo eziqondiswe kwabasakhulayo, njalo zigoqela wonke umuntu kanye lenhlanganiso ezitshiyeneyo, yikho okwenza ilizwe lingaphumeleli kwezemidlalo kuthi labadlali labo behluleke ukuziphilisa”.
UHlongwane uthi amaqembu adlala imidlalo etshiyeneyo kumele abe lempande zawo emphakathini njalo uhulumende ulohlelo lokuba lokhu kufezeke kusetshenzwa ndawonye lezikolo kanye lamakolitshi.
“Sisiya phambili sihlele ukusebenza ndawonye lezakhamizi, izikolo kanye lamakolitshi. Inhloso kahulumende yikuba sisebenzisane lozulu lenhlanganiso ezehlukeneyo ukuba kube lamaqembu agxile impande emphakathini. Lokhu kuzakwenza kube lula ukunanzelela lokunakekela abantwana abalekhono”.
Umphathintambo uqhubekele phambili wathi ezemidlalo kumele ziqakathekiswe wakhuthaza njalo ukudlalwa kwemidlalo yesintu .
“Kuqakathekile ukuba bonke abantu abaphatheke kwezemidlalo babe kwazi umlandu obhekane labo. Ukuze loluhlelo luphumelele kumele zonke inhlanganiso zibe leqiniso lokuba amaqembu agxile impande emphakathini ayabunjwa”.
Lumhlangano ungenwe zinkokheli zenhlanganiso zemidlalo etshiyeneyo njalo zithole ithuba lokuba zethulele umphathintambo izanhluphe lezankhathaze abahlangana lazo emsebenzini wabo wokuthungamela ezemidlalo.