UNkosikazi Hillary Clinton ubhuqe uMnu. Donald Trump ngoMvulo ntambama kungxoxo mpikiswano yokhetho lukamongameli weMelika eyenzelwe ekolitshini lemfundo ephuzulu eye Hofstra University eNew York.
Inengi labantu akade bebukele ingxoxo mpikiswano le bathe uClinton umlahle phansi uTrump. Inhlolisiso eyenziwe yi-CNN-ORC iveze ukuthi uClinton unqobe uTrump ngokuyisilinganiso sokungamatshumi ayisithupha lambili ekhulwini – 62 percent – yena wazuza okuyisilinganiso sokungamatshumi amabili lesikhombisa ekhulwini – 27 percent.
Bathe bekusobala ukuthi uTrump ubuye engazimiselanga ukukhuluma okungakhanga uzulu ukuthi amvotele. Baphinde njalo bathi uTrump uzamile ukuzimisamisa beqalisa ingxoxo mpikiswano le ngesikhathi ekhuluma ngamandla akhe wonke ngendlela yokuthuthukisa umnotho wele Melika kodwa walahleka njengoba kade engathi udlela njenganhlanzi.
UTrump uphendule nzima ukuthi yindaba engavezi ukuthi uhlawula njani umthelo welizwe owe-tax.
“Ngizakwethulela uzulu indlela engihlawula ngayo imithelo yelizwe eye tax loba nje lokhu kusaliwa ngamagqwetha ami nxa yena (uClinton) engaveza ukuthi zayangaphi incwadi zikahulumende ezifika inkulungwane ezintathu ezacitshwa ebulenjini beInternet.”
UTrump uzame ukuvuselela udaba olukhathaza uClinton olokusebenzisa indlela engaqondanga yokuthumeza imlayezelo kahulumende ebulenjini beInternet kodwa konke lokho kuphelele emoyeni.
Uthole imbila zithutha njengoba uClinton ubezimisele ukwenza akulande e Hofstra University.
“UDonald Trump uyangichothoza ukuthi ngibuye ngizimisele ukuphatheke kungxoxo mpikiswano le. Kuliqiniso ukuthi ngibuye ngizimisele. Uyakwazi ukuthi kuyini njalo engibuye ngizilungisele khona? Ngibuye ngilungiselele ukuthi ngibe ngumongameli weMelika.
“Kusobala ukuthi uTrump kazibuthanga empilweni nje. Imicabango yakhe ngezikhali ze-nuclear iyethusa. Ngakho-ke umuntu ocatshulwa ngokwethulwa ebulenjini beTwitter akumelanga asondele lapho okuleziqondiso khona zokusebenzisa izikhali ze-nuclear.”
Ugcizelele esithi, “Angithembi ukuthi uzakwethula okusemthethweni okutshengisela indlela ahlawula ngayo imithelo yelizwe eye tax.”
Lokhu bekungokokuqala ukuthi bangqikilane kungxoxo le elisiko ekukhethweni kukamongameli weMelika. Bazadibana njalo ngenyanga ezayo.
Ozanqoba kukhetho oluzakwenziwa ngoLwezi uzangena esikhundleni esisabanjwe nguMongameli Barack Obama ozakwenelisa lonyaka isikhathi sokuba ngumongameli weMelika.
Ukuze sihlaziye okwenzakale izolo, akesizwe uMnu. Mkhululi Ndabambi, isizalwane seZimbabwe esihlala eIndiana kwele Melika, othe uClinton wenze kahle loba nje kumele aqaphele kungxoxo mpikiswano ezilandelayo njengoba uTrump efunda masinyane endlela ezibalulekileyo zokukhuluma emphakathini.
