Udaba obelusemthethwandaba weHigh Court olokuvimba icele leMDC-T elikhokhelwa nguNkosazana Thokozani Khuphe ukuthi lingasebenzisi ibizo lokuthi MDC-T solulahlwe ngumthethwandaba othi kumele abakucele lebandla leli elikhokhelwa nguMnu. Nelson Chamisa bahlawulele ukuthethwa kwalo.
Abecele elikhokhelwa nguMnu. Nelson Chamisa bakhweze udaba lolu emthethwandaba besithi bona yibo iMDC-T esemthethweni ngoba uMaKhuphe waxotshwa ebandleni ngakho-ke akalalungelo lokusebenzisa ibizo kanye lempawu zalo.
Umahluli wodaba lolu eHigh Court, uJustice Francis Bere, ubeke eceleni loludaba esithi akula bufakazi obusobala kuye ukuthi yiliphi phakathi kwamacele womabili okukhanya kuyilo iMDC-T uqhobo.
Uqhubeke esithi akula sidingeko sokuthi loludaba lwahlulelwe ngesiphangiphangi. Icele lika Chamisa yilo elizabhadala indleko zonke zomthethwandaba.
Ingqwetha ebelimele icele lika Chamisa, uMnu. Lucas Nkomo, uthe balokudana okukhulu ngesinqumo sikamahluleli ngakho-ke balakho ukulukhweza emthethwandaba waphezulu oweSupreme Court nxa sebehluze isinqumo sikamahluleli.
Ingqwetha elimele icele lika MaKhuphe, uMnu. Lovemore Madhuku, uthe umahluleli ukubeke sobala ukuba kukhanya kulamabandla amabili asebenzisa ibizo elifanayo ngakho-ke kumele wona akulungisise wodwa elandela isisekelo sebandla.
Umgcinisihlalo webandla le MDC- T ekhokhelwa nguMaKhuphe, uMnu. Abednico Bhebhe, uthi bazaqhubeka besebenzisa ibizo leli ngoba sebelungisise udaba lobukhokheli kucongress abebelayo ngempelaviki edluleyo.
Omunye osekela icele lika Chamisa, uNkosikazi Sakhile Dewa, uthe lapha abantu bathabela ize ngoba udaba lolu alukacaci ukuthi luzaphela njani njalo lukhatshana lokuphela.
Abalandeli bamacele womabili bebehlabela begida phambi komthethwandaba weHigh Court abecele likaMaKhuphe bejabulela ukuthi bazaqhubeka besebenzisa ibizo lokuthi MDC- T.
