Umkamongameli Robert Mugabe uNkosikazi Grace Mugabe uchaze umkakhe, ukuba uyinkokheli eyakhethwa nguNkulunkulu,ebusa ngendlela elobuhlakaniphi obuvela kumdali kungakho uzasuswa nguThixo hatshi abantu nje mathupha. Unkosikazi Mugabe wethule amazwi akhe eseBinga namhla.
Unkosikazi Mugabe onguye njalo unobhala omkhulu wohlangothi lwabesifazane ebandleni leZanu Pf ubekhulumisana lozulu weBinga, obebuthene endaweni yamavinkili e Binga Centre,ngesikhathi eye ukuyavuselela uhlelo lwezokulima ngokuthelezela, olulempahla ebesingasetshenziswa selokhu lwasungulwayo loluhlelo ngomnyaka ka 2005.
Unkosikazi Mugabe uqhubeke ethuka owake waba ngumsekeli kaMongameli uNkosikazi Joice Mujuru, umkhokheli welinye lamabandla aphikisayo uMnumzana Morgan Tsvangirayi kanye labenhlanganiso ezisebenzelana lozulu.
UNkosikazi Mugabe uthethe lelithuba ukuthuka obengumsekeli
kamongameli, unkosikazi Mujuru,embeka umlandu wokukhuthaza imisebenzi yokungezwani phakathi kwamalunga ebandla le Zanu PF endaweni yokuqhuba imisebenzi yentuthuko,emfanisa
lesigiqabulongwe.
UMugabe uthuke njalo omkhokheli welinye lamabandla aphikisayo,le MDC,umnumzana Morgan Tsvangirayi,embeka umlandu wokungabi lothando kuzulu weZimbabwe, engofuna amandla wokukhokhela nje kuphela.
UMugabe utshele uzulu weBinga ukuba abohlakanipha,angaze ayengwa lokudlelezelwa ngabenhlanganiso ezizimelelyo eziphathisa uzulu abeza kibo bethi bazobatholisa usizo,kanti inhloso yabo kuyikuqhubekisela phambili imisebenzi yalabo abafuna ukugenqula umbuso kamongameli
Robert Mugabe.
Kodwa umkhokheli webandla eliphikisayo,othukiweyo laye,umnumzana Morgan Tsvangirayi,utshele iStudio Seven ukuba inking ngomongameli Mugabe kuyikuba sewazitshela yena ukuba nguye ozabusa kuze kube nini kodwa wengeza esithi ezakufa lelizwe kanye lebandla.
Inkulumo kaMugabe isolwe ngabanengi e Harare abagoqela umnumzana Mxolisi Siziba othi ukuthukana kungalethi nguquko
kwezomnotho welizwe.
USiziba uthi akukhangeleleyo yena labanye, yikubona uhulumende ethuthukisa izigaba okubalisa sona eseBinga, libuyele ilizwe kusimo salo ebesikilo kuminyaka yangemuva, hatshi ukube lokhe kugconwa abantu abangelacala,inkokheli ebandleni yeZanu Pf isazi ukuba yiyo evoxileyo
kuyo yonke le iminyaka engamatshumi amathathu lanhlanu isembusweni.
Ekupheleni kwalomhlangano lozulu weBinga,unkosikazi Mugabe unikeze abantu izipho ezibalisa amasepha amabili, amfutha okuphekisa ayisilinganiso se 2 litre, irice esisindo se 2 kgs lemphahla yokugqoka umuntu ngamunye.
Isigaba seBinga sisazakala ngokukhetha abamabandla aphikisayo ngoba uzulu wakhona ehlezi ekhala ngokuthi uhulumende engabanakekeli,kuyisigaba esisalele muva kwezontuthuko.
