UMongameli Donald Trump uthi ngoLwesithathu lusuku lokukhalela imuli kamuyi uGeorge H. W. Bush obhubhe ngoLwesihlanu.
Isidumbu sikamuyi ngoMvulo besisendaweni ebizwa ngokuthi yiCapitol Rotunda lapho uzulu abevunyelwa ukuthi asibone.
Isidumbu sikamuyi sizabe sibekwe njalo eNational Cathedral eWashington DC engakangcwatshwa ngoLwesine eTexas.
UMongameli Trump lomkakhe, uNkosikazi Melania Trump, bazahamba emncgwabeni kaBush.
Abantu abanengi bakhangelelwe ukuthi bazabe besemngcwabeni kaBush obhubhe eseleminyaka engamatshumi ayisitshiyagalolunye lane – 94.
UVumani moyo, ingcwethi kwezombusazwe, uthi uBush wayeyindoda eyeyithakazelelwa ngabantu abanengi elizweni leMelika loba kwakulabanye abathi wayethanda impi.
“Nxa sikhangele umuntu olezithupha zesikhundla sikamongameli lobungcitshi bomsebenzi ngumongameli obelakho konke lokhu.”
UBush, owaphatheka empini yomhlaba wonke jikelele eyeWorld War II, wadutshulwa esendizamtshineni labanye abakhe abawela elwandle yena wasila.
Abanye bakhe batshabalala engozini leyo.
Wazalwa ngomnyaka ka 1924 eMilton esabelweni seMassachusetts kwathi ngomnyaka ka1942 waya empini yomhlaba wonke jikelele wabuyela ekhaya ngomnyaka ka1945.
Umkakhe uNkosikazi Barbara bush ubhubhe lonyaka. Utshiye abantwana abahlanu uGeorge (owake waba ngumongameli), John (owaziwa ngokuthi nguJeb), Neil, Marvin, loDorothy. Omunye wabantwana bakhe uRobin wabhubhe esanda kuzwalwa.
