Abalimi bembalabala ezansi yeMandebeleni bathi lanxa belijabulela izulu elinengi lonyaka, sebekhathazekile ngoba kwezinye indawo izilimo sezisifa.
Umhlubulo wangeZansi yemaNdebeleni usuleminyaka ethile ubhekane lendlala embi ngenxa yokuguquka komkhathi okubangela ukungani kuhle kwezulu kumbe line okungela mkhawulo njengalokhu okwenzakala lonyaka.
Emangweni waseIrisvale, eMbalabala, izilimo ezinengi sezitotile, kutsho uMnu Morgan Lunga, isakhamizi salindawo kuWard 13.
"Silimile sibili lonyaka kodwa kuyabulawa ngamanzi njengoba liyabona khonapha lasezibayeni lapha udaka ukuthi lunjani, so yiludubo esizabalalo,” uLunga utshele iStudio 7.
Ukhulu uZenzo Khabo laye ohlala kuWard 13 uthi izulu elinengi kanje limthathe lamkhumbuza esengumfanyana
"Kusikhumbuze iminyaka eyadlulayo eyakudala sisakhula sisagqoka imitshotsho yamasaka kungela ma-rain coat,” kutsho uMnu Khabo.
“Okukhona lonyaka sizathola, silimile khonokhu esikulimileyo lanxa okunye kusuke kwakhanywa ngamanzi. Kodwa okukhona sizakudobhadobha abantu bazakudla, akufani leminyakeni. Indlala yezulu ingcono kulendlala yokoma."
Abalima izulu lingakaqali phansi kohlelo lweGa Tshopo abafana loNkosikazi Ottillia Ncube bathi izilimo zabo sezivuthiwe.
"Ngiyadla konke njengoba ubona lamajodo enje etutuma ayisikho ukuthi ngamajodo engawahlanyelayo ngumkhukhuzela lo.
"Konke kuhle uGa Tshopo lo utshaya aze ayefika le, aphenduke aye le loMlimisi wathaba okumangalisayo wasipha i-fertiliser," kutsho uMaNcube.
