Lanxa izulu liqhubeka lisina kuhle emhlubulweni weGwanda, inengi lithi libhekane lendlala embi lonyaka ngoba izulu leli lithole izilimo sezitshile zafa.
Abanye ngasebelima kutsha. Kodwa lokhu kungaba yikuphumputha nje emnyameni ngoba isikhathi sokuhamba kwezulu sesisondele kanti njalo isikhathi sokulima kudala sadlula.
Isakhamuzi seNsimbi, ugogo Letwina Sibanda utshele iStudio 7 ukuthi baqale ukulima ngoLwezi nyakenye bekhangelele isivuno esihle kodwa umkhathi wasuka wajikisa.
“Salima sisithi sokuyisikhatho sokulima kodwa kwasuka kwatsha,” kutsho uMaSibanda.
Wengeze wathi inkulu indlala ababhekane layo lonyaka. Ngokunjalo, uthe, uhulumende kumele angenele abasize ngokudla.
“Emasimini akulalutho, imali ayikho. Kambe siyakudlani? Sikhala ngokudla, ukudla yiyo inkalakatha. Sikhala ngokudla,” siqhubeke sichasisa isalukazi.
Isakhamuzi seMawane, uNkosazana Molly Ncube laye uthe kusikhatshana esilandelayo nje umangoye uyabe eselala eziko.
“Lokhu sokuyikulima kabili lokhu esikuhlakulayo ngoba okwakuqala kwatsha. Sithi engxenye singazuza okulutshwana okunjengomumbu,” kutsho uNcube.
Esigabeni seNsimbi lakho umumo awumuhle. Isakhamuzi uMnu. Elias Dube uthe loba nje kweyakhe insimu kuthembisa, omakhelwane bakhe basenkingeni enkulu.
“Ubungcono bomuntu oyedwa esigabeni akungeke kuncede isizwe sonke, okutsho ukuthi izandla ezinengi zokuncedisa ziyafunakala. Abantu kumele badingelwe usizo,” kutsho uDube.
Lanxa uzulu ekhathazekile, uhulumende kaMongameli Emmerson Mnangagwa uthi akulamuntu ozabulawa yindlala ngoba elomumbu oyeneleyo eziphaleni zakhe.
Uhulumende ulenhlelo zokuncedisa uzulu wemaphandleni ngokudla. Kodwa abanye bathi ukudla lokhu kuphiwa abasekeli bebandla leZanu PF kuphela.
