Umsekeli kaMongameli welizwe uMnu Kembo Mohadi usekhuthaze izakhamizi zemaphandleni ukuthi ziqakathekise ukudibhisa inkomo zazo ukuze zilondolozeke.
UMohadi wethule amazwi la ekusungulweni kohlelo lokulwisana lemikhaza olweNational Tick Blitz eBengo, eGwanda South, ngoLwesihlanu lapho ethese khona abamhlophe umlandu wokuletha imikhuhlane yenkomo elizweni.
Uthe eminye imikhuhlane efana leJanuary Disease yafika eZimbabwe ngesikhathi abamhlophe bethenga inkomo ezilemikhuhlane kwamanye amazwe bengakwazi.
"Kulusizi ukuthi abamhlophe bezama ukwengeza inani lenkomo kuleli bangenisa inkomo zeKenya leTanzania ngomyaka ka1901 bengazi ukuthi sebetheze olulenkume ngoba zayabuya lomkhuhlane weJanuary Disese,” kutsho uMnu Mohadi.
“Ngomnyaka ofanayo bangenisa ezinye inkomo ezizinkulungwane zivela kweleAustrialia ezafa zaphela du kwasala ezintathu kuphela zibulawa ngumkhuhlane wemikhaza, umkhuhlane lo awusiwo walapha, wabuya labancindezile."
Ngokunjalo, uMohadi uthe uhulumende uzakhipha imali engangeUS$500 million ezathenga imithi yemikhaza efana leTick Grease ukuze izakhamizi zingalahlekelwa yinotho yazo.
"Izigidi zabantu elizweni lonke jikelele zizathola ikhilogramu elilodwa lomuthi wemikhaza njalo lizawuphi kungela mbhadalo,” kutsho uMohadi. “Yiwo amanyathelo esiwathathayo sikhangele ukuthuthukisa umnotho wakuleli ngomnyaka ka2030."
Izakhamizi zeGwanda South ziveze ukujabula ngalohlelo.
"Siyakuthokozela okwenzwe nguhulumende ngohlelo lolu,” kutsho uMnu Killion Ndlovu isakhamuzi seFumukwe. “Inkomo zethu sezizathola uncedo ngoba thina besesehlulwa zinkomo sezisifa ngemikhuhlane yemikhaza, mina ngibonga ngezandla zonke zombili."
UNkosikazi Viola Ndlovu oyisakhamuzi seBengo yena uthi ulethemba lokuthi loluhlelo alusoze lwaba yize njengezinye inhlelo zikahulumende.
"Siyakubongela, ngabe kuyabuya kuphumelele kube yinto ephumelelayo, inkomo ziqakathekile sibili ngoba yiyo infuyo yethu nxa singelankomo lembuzi impilo yeti iba phansi kakhulu."
Ngaphandle kodubo lwemikhaza, umlisa weMatulungundu uMnu Nyakalo Makhurane utshele iStudio 7 ukuthi izakhamizi zibhekane lodubu lwamadlelo kanye lamanzi.
"Udubo lwakhona yikuthi eZimbabwe ngapha eMatabeleland siphila ngenkomo kodwa baziletha enkangala engela kudla. Akula kudla lakhathesi endaweni zakoMathe ledamu akula selokhu kwaba le-disaster yamadamu akukalungisa," kutsho uMnu Makhurane.
Olunye udubo oluhlangana lezakhamizi kulumango yikutshontshwa kwezifuyo, kutsho esinye njalo isakhamuzi uMnu Madlambezi Ncube.
"Into esihluphayo kakhulu lapha kulabanye asebevuke eseganga. Bayabutha impahla zethu sithi siyakhuluma babelathi esitikini ngokuthi bona sebethenge ama-lawyer. Nxa usithi uyakhuluma usungumuntu omubi, angithi awula mali," kutsho uMnu Ncube.
Induna zeZansi yemaNdebeleni zinikezwe inkunzi ukuze ziyethuthukisa ukwanda kwenkomo ezigabeni zazo. Leli linyathelo elamukelwe yiNduna uMarupi weSilonga.
Umphathintambo obona ngezokulima uMnu Masuka uthi ugatsha lwakhe luzathuthukisa ezomnotho wakuleli ngokubona ukuthi uzulu emaphandleni ulima izilimo ezihambelana lomumo yomkhathi kuleyondawo.
