Izakhamizi zemaphandleni enyakatho lasezansi yeGwanda seziqalisile ukuzakhela amadamu ngoba zisithi akulalutho olwenziwa nguhulumende ukuqeda udubo lwamanzi ezibhekane lalo.
Izakhamizi zeMatshiya eMatshetsheni, eGwanda North ziphakathi kokwakha idamu leSisonke Jonas zisukela phansi ukuze ziqede udubo lokusilela kwamanzi kulumango.
Umsakazo weStudio 7 wethekelele kulindawo kuliviki wathola izakhamizi zibambe iqhaza, kuluthuli kukhala ipiki lefotsholo.
Omunye wezakhamizi lezi nguMnu John Magutshwa uthi sebezwile ngokuhamba imango emide besiyakukha amanzi.
“Esigabeni sakithi lapha akulamanzi, sihamba 15km sisiyadinga amanzi. Sesiphelelwe ngamadonki safelwa yizinqola konke asiselakho sesisithi kungcono senze idamu ukuze sithole amanzi eduze,” kutsho uMagutshwa.
Esinye njalo isakhamuzi uNkosikazi Nokuthula Mlilo uthi basengozini enkulu lezifuyo zabo lonyaka nxa izulu lingaphuza ukuna ngoba amanzi esetholakala nzima.
“Sisengozini yokuthi izulu nxa lingaphuza ukuna kuzawonakala ngoba sihamba umango omude lezifuyo silanda amanzi yonalawo angasekho kahle lezibholani zakhona ziyastha amanzi akahona ayamelelwa,” kutsho uNkosikazi Mlilo.
Izakhamizi zeMatshiya sezigebhe imigelo, zagamula lezihlala zaphinda njalo zagqula lamatshe okwakha umbundu.
UMnu Asset Phiri, esinye isakhamuzi uthi konke lokhu bazenzele ngezabo njalo kuveza ukuzinikela kwabo njengesigaba.
“Konke lokhu besizenzela njengophakathi yeMatshiya sibuye sizogamula izihlala sigebha ilanga lonke lapha sizigamulela ngamahloka sizigebhela sisebenzisa awethu amatools kathesi indaba esiyisiqokoqela okokuthi nga uhulumende uyafaka isandla sakhe yisamende lisidingele lama-donor,” kutsho uMnu Phiri.
Amazwi kaPhiri agcizelelwe nguNkosazana Sibusiso Nhliziyo yena othe bafuna phose inkulungwane ezimbili zesamende ukuze bakhe umbundu.
“Silezandla ezimfitshane ukuthi umsebenzi wethu uye phambili asila samende, ukuthi singathola isamende lamanzi ukuthi sakhe umbundu lobhilida ongasincedisa ekwenzeni idamu lethu ukuze sithole amanzi, ngoba amanzi esiwatholayo emangweni angcolile angasenza sithole imikhuhlane,” kutsho uNkosazana Nhloziyo.
Izakhamizi zeMafuko eGwanda South lazo ziphakathi kokwakha idamu lazo eladilika eminyakeni edluleyo.
Omakhelwane eGungwe labo bathi sebebona kungcono ukuthi baqoqane bazilungisele idamu labo eselileminyaka ladilizwa lizulu.
Ukwakhiwa kwedamu elikhulu eleTuli-Manyange eNtepe elikhangelelwe ukuqeda udubo lwamanzi kulumango kumile okwamanje ngenxa yokuswelakala kwemali.
Imizamo yokukhulumisana labogatsha lwamanzi olweZimbabwe National Water Authority yehlule. Kodwa bahlezi besithi bazimisele ukulungisa amadamu adilikayo.
