Inkomo zibikwa seziqalisile ukucuba kwezinye indawo ezansi yeMaNdebeleni ngenxa yedlala lokusilelwa kwamanzi ngoba amanye amadamu esesitsha.
Indlala ehlasele nyakenye ibulale inkomo ezedlula izinkulungwane ezilitshumi lasithupha, 16,000, endaweni ezitshiyeneyo zeMatabeleland South.
Lanxa izanusi zomkhathi zisithi lonyaka kukhanya kuzakuna izulu elaneleyo eZimbabwe lasemhlubulweni wezansi yeAfrica, ezinye izakhamizi zithi izifuyo zazo seziqalisile ukucuba ngenxa yendlala lokusilela kwamanzi.
“Abadala lapha baphila ngokuthengisa imbuzi lenkomo kodwa lonyaka kuyafiwa ngoba inkomo seziqalile ukucuba zibuthene eMzingwane khonangale eziyake zidle khona,” kutsho isakhamuzi seTshanyawugwe, uMnu Jephias Dube.
Isigaba seBeitbridge yiso esafelwa zinkomo ezinengi ukwedlula zonke eMatabeleland South nyakenye silandelwa ngeseBulilima, kuzobuya iGwanda yona eyalandelwa yiInsiza.
Ngaphandle kwezifuyo, abantu abanengi abakhulume leStudio 7 eGwanda South labo bakhala ngokuthi umangoye uselala eziko.
Bathi ngaphandle kokuthi bathole uncedo oluvela kuhulumende, bazabulawa yindlala.
Esinye njalo isakhamuzi, uNkosikazi Mnyadziwa Siziba, olima imbhida esivandeni seSibambene Garden, uthi udubo yimpuphu.
“Ngikhonapha angikwazi ukuthi ngizakudlani, imbhida yonale ngizafika ngisikelele ngifake lamatamatisi sipheke, impuphu akusela,” kutsho uNkosikazi Siziba.
