Izakhamizi zakoBulawayo zithi amankampani awaqhatshwa ukuthi alungise indawo zemidlalo phambilini kwemidlalo ye African Union Sports Council Region V Youth Games alokhu engalaleli izikhalazo zokuthi kuqhatshwe abantu bakulelidolobho ukuqhuba lumsebenzi.
Amabandla ezombuzaswe elizweni abekhonona ngokuthi uhulumende uqhatshe amankampani angasiwo akoBulawayo, wona aphinde alethe abantu abavela kwezinye izigaba, ikakhulu eHarare ukuthi bezosebenza koBulawayo.
Izakhamizi ezihlala ku Ward 13 lapho okulungiswa khona inkundla ye White City Stadium Zithe zizadiliza osokwakhiwe kulindawo inkampani esebenza kulinkundla ingekela ukubaqhatsha ilanga lingakatshoni lamuhla.
UMnu. Ambrose Sibindi, isiphathamandla seBulawayo Progressive Residents Association utshele uSithandekile Mhlanga weStudio 7 ukuthi inhlanganiso yakhe yayixwayisile ikhomithi elungiselela lumhlangano ukuthi kuqakathekile ukuthi izakhamizi kanye labanye abantu baphatheke kuloluhlelo ukwenqabela uhlupho olufana lalolu.
