UMongameli Emmerson Mnangagwa uthi abantu kabasoze bahlawulele ijekiseni yokunqunda igciwane leCOVID-19 ezasetshenziswa kwele Zimbabwe.
UMnangagwa, owethule lokhu embikweni wakhe oweState of the Nation Address awenze kumabonakude, uthi ijekiseni ezasetshenziswa kuyabe kuyileyo ehlolisiswe zingcwethi kwezempilakahle yatholakala ilungele ukuhlatshwa uzulu.
Wethule umbiko lo kusanda kwethulwa omunye umbiki nguMnu. Mthuli Ncube, okuhlangothi lukahulumende olwezemali okubikwa ukuba ubefisa ukuthi uzulu ahlawulele ijekiseni ethengwa nguhulumende.
UMnangagwa uthe bazimisele ukulwisana lomkhuhlane lo ngokuthi kuhlatshwe kuqala abezempilakahle, abalemikhuhlane etshiyeneyo, asebekhulile labanye.
Uphinde wathi kukhangelelwe ukuthi kuzahlatshwa abantu abayisilinganiso sokungamatshumi ayisithupha ekhulwini – 60% eZimbabwe ukwenzela ukuthi kuvinjwe ukumemetheka kwegciwane leCOVID-19.
Ubonge eleChina athi selinike eleZimbabwe ijekiseni yeCOVID-19 ebizwa ngokuthi yiSinopharm.
Uthi kumele abantu bezivikele kumkhuhlane weCOVID-19 loba sokuzahlatshwa abantu ijekiseni yeCoronavirus.
UMnangagwa uthe basebenza lamanye amazwe kuzwekazi leAfrica ekudingeni ijekiseni ngendlela ezilula.
Umsekeli kamongameli, ongumphathintambo njalo wezempilakahle, uMnu. Constantino Chiwenga. laye uphathe udaba lwejekiseni embikweni wakhe awethule emsakazweni weZBC wokunanza usuku lokunqabela umkhuhlane wemvukuzane emhlabeni jikelele eleWorld Cancer Day.
“Uhulumende weZimbabwe ubelethuba elihle wathola usizo lwamajekiseni asuka eChina ngakho ilizwe selizathi lihlabe mahala wonke umuntu ijekiseni elivikela iCOVID-19.”
Umngcinisihlalo wekhomithi yedale lephalemende ebona ngezempilakahle, uDokotela Ruth Labode, uthi ijekiseni elivikela iCovid-19 lizaqala liyehlolwa ekolitshini lemfundo yaphezulu iUniversity of Zimbabwe, lingakahlatshwa uzulu.
UDokotela Labode uphinde waphatha udaba lokuthi uhulumende kumele angezelele indawo ezihlola igcikwane leCovid-19 kungela mbadalo elizweni jikelele.
Amazwe abalisa eleSouth Africa lele Bostwana wona kuviki edlule achaze ukuba azahlaba wonke umuntu kungakhathalekile ukuba ungubani kungelanhlawulo.