Uhulumende weZimbabwe uthi ulakho ukuphikisa isinqumo esisanda kwethulwa lidale leHigh Court kwele Bhilithane elithi kumele kuhlawulwe amankampani amabili ahluthunwa phansi kohlelo lokwabela uzulu umhlabathi izigidi ezilikhulu lamatshumi amahlanu lanhlanu amadollar eMelika – 125 million United States dollars.
Isigwebo lesi sethulwa yinhlanganiso yeInternational Centre for Settlement of Investment Disputes ngomnyaka ka2015.
Umahluli wedale leli uJustice Julia Dias ulahle isicelo seZimbabwe esokuthi akumelanga inhlanganiso le, eyabunjwa ngomnyaka ka1996 libhanga elikhulu eliboleka imali amazwe wonke eleWorld Bank, liphathe indaba zelizwe leli. UDias uthe kumele kuhlawulwe imali le inkampani yeBorder Timbers Private Limited leHanganani Development Limited ezaphanyeka udaba lolu eCentre for Settlement of Investment Disputes ngomnyaka ka2010.
Uhulumende weZimbabwe uthi ulakho ukuphikisa okwethulwe nguDias. UNkosikazi Virginia Mabhiza igqwetha elikhulu
Umphathintambo obona ngezemithetho UMnu. Ziyambi Ziyambi walile ukuchaza ukuthi uhulumende wakhe uzakwenzani esithi iStudio 7 ayikhulume lomtshutshisi omkhulu welizwe
"Tshayela ucingo uAttorney General nguye owaphatheka kuloludaba njalo nguye owayehamba enkantolo yeLondon elanda lelicala. Ngibona kunguye okufanele ukuthi akhulume ngaloludaba ngoba wayemele uhulumende."
Umtshutshisi omkhulu welizwe uJustice Loyce Matanda-Moyo laye walile ukukhuluma ngodaba lolu.
"Mina ngingu Justice Matanda-Moyo umtshutshisi omkhulu kungcono ukhulume legqwetha elikhulu yilo eliphethe loludaba."
Akwaziwa ukuba eleZimbabwe lizaphanyeka nini udaba lolu emthethwandaba kulandela isinqumo esithethwe lidale leHigh Court kwele Bhilithane. Igqwetha elizimeleyo eliyingcwethu kwezomthetho womhlaba - international law - njalo elilwela ilungelo loluntu, uMnu Lwazi Jamela, uthi eleZimbabwe kumele lilandela ezomthetho.
Sona isinqumo lesi singabe sisitshoni? Kumele eleZimbabwe lenzeni kuyiwa phambili?
UJamela uthi eleZimbabwe lakho ukulahlekelwa ngeyinye impahla yalo ekwele Bhilithane ingehluleka ukuphikisa isinqumo lesi.
"Yisinqumo sokulahlela khatshana isicelo seZimbabwe esokuthi isinqumo setribunal singabhaliswa njengo kwahlulelwa kwale Ngilandi. So, ukubana ukuthi nxa sesikhuluma khathesi kutshukuthi isinqumo lesiyana ese tribunal sesibhalisiwe njengo kwahlulelwa kwedale lenkundla ezomthetho oweNgilandi usitsho ukuthi alubana osamabhizimusi laba bazahambisela phambili indaba yabo, isinqumo lesi sigcwaliswa njengokugcwalisa okwenza izinqumo zonke zase mthethwandaba wase Ngilandi. iZimbabwe nxa ilempahla kumbe ilezinto ezikwanisa ukuthi zibanjwe zithengiswe ezifika khona isikwelede se 124 million le interest yakhona zilakho ukuthi zibanjwe khonale engilandi zithengiswe kumbe izimbabwe izabhadala osamabhizimusi kumbe izayekele njengoba kukhanya iyakhonona izimbabwe ayifuni ukuthi ibhadale."
Ingcwethu ehlaziya ezombusazwe njalo elwela amalungelo kazulu ekunhlanganiso yeNational Consumer Rights Association of Zimbabwe uthi isigwebo lesi yisifundo esikhulu ukuthi uhulumende weZimbabwe alandele umthetho kunhlelo zakhe.
"Umthetho kawulandelwe uhlolisiswe ukuthi kambe umthetho uthini kwenziwe khonokho okuthi umthetho awenziwe kungathatha izinqumo zepolitki kungathathwa izinqumo leziyana ezibonisa ukuthi umthetho awuhlonitshwa ngoba phambili kuyahlala kulimaze njalo sezifunakala imali zakhona."
EleZimbabwe lahluthuna amapulazi abamhlophe kusukela ngomnyaka ka2000 lisithi abansundu kabalamhlabathi wokulima. EleBhilithane lamanye amazwe ahlaba umkhosi esithi akukho emthethweni okwenziwa ngele Zimbabwe. Kodwa owayekhokhela ilizwe ngesikhathi lesi umuyi uRobert Mugabe watshaya phansi ngenduku esithi sesifikile isikhathi sokuthatha umhlabathi uphiwe abansundu.
Forum