Umphathintambo kahulumende obona ngezemali, uMnu. Mthuli Ncube, uthi sokumele imithelo eminengi kanye lokwenzelwa uzulu nguhulumende kubhadalwe ngeZimbabwe Gold (ZiG) ukwenzela ukuba imali le ithakazelelwe njalo isetshenziswe elizweni lonke.
Uphinde wathi kuzakwesulwa imithelo yentengo yembuzi lokunye ukuze kubelabantu abanengi abathengisa izifuyo ngemali elesisindo ngesikhathi ilizwe libhekane lendlala enkulu lonyaka.
Ncube, okhulume lokhu edale lephalamende eHarare namuhla ngesikhathi esethula umbiko wakhe oqakathekileyo wokuhlolisisa ezomnotho oweMid-Term Policy Review Statement, uthe eleZimbabwe lingeke lathuthuka ngemfanelo uma kungasetshenziswa ngemfanelo iZiG.
“Sesifka umthetho ukuba amankampani wonke abhadale imthelo ngama ZiG ukuze kukhulise ukusetshenziswa kwemali yethu.’’
Ukubeke sobala ukuthi kumele kuguqulwe imithelo efana lowe Presumptive kanye leCorporate taxes ukwenzela ukuba kuthuthukiswe umnotho welizwe okumele uxghile emalini yeZiG.
Uthe kulemithetho eminengi okumele iguqulwe ukwenzela ukuba izifiso zikahulumende zifezeke. Lokhu kugoqela ukubumba umthetho we-customs duty ozalawula ukuthwalwa kwamafutha epetulo, igwayi elihotshwa kusetshenziswa imitshina lokunye.
UNcube uphinde wathi kuzamele kususwe umthelo weValue Added Tax kuntengo yenyama yembuzi, izimvu, inkukhu lewotshi.
Ngapandle kwalokhu, uthe sokumele kulungiswe imithetho ezavimba ubukhohlakalo eZimbabwe. UNcube uqhubekele phambili esithi kulokuphumelela okukhulu elizweni okubangelwa yindlela zokuqiniswa umnotho ezabekwa nguhulumende.
Ngendlala ezisalyo lawe uyabona ukuthi kuyasetshenzwa, igwaqo iyakhiwa, umnotho wethu uqhubeka usiya phambili lobanje sibhekane lobunzima bendlala.’’
Uthe kukhanya kulenguquko kwezentengo yempahla etshiyeneyo loba ilizwe lidonsa nzima ekutholeni imali yokuqhuba ihlelo ezitshiyeneyo. Uthe kufunakala amabhiliyoni phose ayisithupha 5.6 billion ZiG ukuze kubhadalelwe inhlelo zikahulumende. Kusenjalo, ukubeke sobala ukuba umnotho welizwe ukhangelelwe ukuthi lonyaka uzathuthuka kancane kulanyakenye ngesilinganiso sokubili ekhulwini – 2%.
Uthe kulamanye amabhizimusi agoqela ukwenjiwa kwemigodi, ezokuthwalwa kwempahla lokunye okumele kufakwe kumthetho weIndigenization and Economic Empowerment Act. UNcube uthe lokhu kuzakwenza abadabuka eZimbabwe bengene ngobunengi kumabhizimusi la.
Esanda kugqiba umbiko wakhe, kuhle kwaxokozela edale lephalamende abaphikisayo besithi kumele kuhlolisiswe okwethulwe nguNcube namuhla kodwa abakubandla elibusayo bekwala lokhu. Omunye wabazondiswe ngokwethulwe nguNcube nguMnu. Discent Collins Bajila omele iLuveve-Makhandeni edale leli.
UBajila uphinde wathi akusoze kwenzakale ukuba imithelo lokunye kubhadalwe ngeZiG.
“Siyakwazi ukuba asisoze sibone kuthiwa sokubhadalwa nge ZiG ubekhuluma ukuthabisa kuphela abantu abasoze bekulandele lokhu.’’
Kodwa ummeli wePelandaba-Tshabalala, uMnu Joseph Tshuma, uthi uvumelana lamazwi kaMthuli esithi uzakuzwa imbono kazulu ngokukhulunywe ngu Ncube.
“Siyakwamukela lokho okutshiwo nguNcube kodwa sifuna ukuba siye kuzulu asitsheli imbono yakhe ngogwalo lolu kodwa ama ZiG siyawamukela.’’
UTshuma uphinde wathi abaphikisayo kumele bebale okumunyethwe lugwalo luka Ncube bengakakhulumi ngakho.
Ezinye ingcitshi kwezomnotho zithi indlela zokuba kusetshenziswe ama ZiG zilungile kodwa uhulumende kumele abone ukuba ama-ZiG ayatholakala emuntwini wonke. Omunye wabo nguMnu Masimba Kuchera.
“Kumele babone ukuba ama ZiG ayatholakala kuzulu wonke hatshi ebantwini abalutshwane kuphela bengenza jalo lokubopha abawathengisa emsikeni wensithi kunganceda.’’
UNcube uphinde wathi eleZimbabwe lilezikwelede ezifika 287.2 billion Z-i-G ezigoqela imali eyabolekwa kwamanye amazwe.
Forum