Uhulumende kaMongameli Emmerson Mnangagwa usenike izinduna ama-Isuzu double cab ngesikhathi eleZimbabwe libhekane lendlala eyesabekayo edalwe yisikhudumezi somkhathi ese-El Nino. Okwamanje eleZimbabwe lidinga amabhiliyoni edlula amathathu amadollar eMelika - US$3.3 billion eyokuthengela abalambayo ukudla.
Abaphikisayo bathi sokunguthaph’utshiye kuhulumende kaMnangagwa, owanika izinduna ezinye izimota ngoNhlolanja lonyaka.
Izimota lezi ezibiza izigidi ezilitshumi lasithupha – US$16 million ziyingxenye yalezo ezithengwe nguhulumende kungelamali ebekwe eceleni eyokuzithenga. Kodwa-ke uMnangagwa onike izinduna imota lezi namuhla eHarare uthe kuqakathekile ukuba inkokheli zomdabu zibe lezimota zokuthwalela uzulu ukudla lokuqhuba eminye imisebenzi.
“Njengoba lisazi ilizwe libhekane lenkalakatha yendlala lonyaka, sifuna ukuba induna zethu kube yizo eziphathisa ukuba abantu bephiwe ukudla ukuze kungabi lomuntu olambayo.”
Induna uWadalala eyeMawaba eGwanda utshele iStudio 7 ukuba bathakazelela izimota lezi.
:Siyabonga kakhulu ngoba bekunzima ukuba senze umsebenzi wethu, ukugada amabhasi akulula. Sithabe kakhulu, mina yikho ngiqalisa ukuphiwa akula okubi ngemota lezi."
Kodwa ingcwethi kwezombusazwe labamabandla aphikisayo bathi imali ethenge izimota lezi bekumele isetshenziswe ukuthengela abalambayo ukudla. Omunye wabasola okwenziwe nguhulumende nguMnu. Divine Hove owebandla leNationalist Alliance Party.
‘’Kulusizi kakhulu ukuba induna zihlala ziphiwa imota,bangabantu abahloniphekayo kodwa ngabe baphiwa amandla ezimali ezigabeni zabo ukuze bengaphili njengezipheleli. Ngabe imali le iphiwe ukuba bathengele abantu ukudla’’
Okunhlanganiso yeDemocratic Forum, uMnu. Zibusiso Dube, yena uthi kumele uhulumende abekwazi okuqakathekileyo ngesikhathi sendlala.
‘’Kumele uhulumende ase imali endaweni eziqakathekileyo hatshi ukufuna ukubapha ukudla khona kulendlala engaka kumele kulungiswe lokhu’’
Uhulumende weZimbabwe lonyaka waphanyeka isicelo sokuncediswa ekudingeni imali yokuthenga ukudla kwabalambayo kunhlanganiso ezitshiyeneyo ezigoqela eyeUnited Nations. Loba kunjalo, kukhanya uhulumende eqhubeka ngezinye inhlelo ezisebenzisa imali enengi eyelizwe ezifana lokuthengela izinduna izimota.
Forum